1 Chronicles 27:1-34
-
Olketa officer wea duim waka for king (1-34)
27 Diswan nao namba blo olketa Israelite, olketa hed lo olketa famili laen,* olketa hed blo wan thousand man and olketa blo wan handred man, and olketa officer blo olketa wea duim waka for king. Each month lo year each grup garem taem for olketa duim waka. Each grup garem 24,000 man.
2 Jashobeam, son blo Zabdiel, hem lukaftarem first grup lo first month, and 24,000 man nao lo grup blo hem.
3 Lo olketa son blo Perez, Jashobeam nao hed blo evri leader blo olketa grup wea olketa markem for waka lo first month.
4 Dodai, datfala Ahohite, hem lukaftarem mek-tu grup lo mek-tu month, and Mikloth nao hem leader, and 24,000 man nao lo grup blo hem.
5 Leader blo mek-thri grup wea olketa markem for waka lo mek-thri month hem Benaiah, son blo Jehoiada, datfala hed priest, and 24,000 man nao lo grup blo hem.
6 Benaiah hem wanfala lo thirti-fala strong soldia and hem lukaftarem thirti-fala strong soldia hia, and son blo hem Ammizabad nao lukaftarem grup blo hem.
7 Asahel, brata blo Joab, hem lukaftarem mek-foa grup lo mek-foa month, and bihaen, son blo hem Zebadiah changem hem, and 24,000 man nao lo grup blo hem.
8 Shamhuth, datfala Izrahite, hem leader blo mek-faev grup lo mek-faev month, and 24,000 man nao lo grup blo hem.
9 Ira, son blo Ikkesh, datfala Tekoite, hem leader blo mek-six grup lo mek-six month, and 24,000 man nao lo grup blo hem.
10 Helez, datfala Pelonite, from tribe blo Ephraim, hem leader blo mek-seven grup lo mek-seven month, and 24,000 man nao lo grup blo hem.
11 Sibbecai, datfala Hushathite, from laen blo Zerah, hem leader blo mek-eit grup lo mek-eit month, and 24,000 man nao lo grup blo hem.
12 Abi-ezer, datfala Anathothite, from tribe blo Benjamin, hem leader blo mek-naen grup lo mek-naen month, and 24,000 man nao lo grup blo hem.
13 Maharai, datfala Netophathite, from laen blo Zerah, hem leader blo mek-ten grup lo mek-ten month, and 24,000 man nao lo grup blo hem.
14 Benaiah, datfala Pirathonite, from tribe blo Ephraim, hem leader blo mek-11 grup lo mek-11 month, and 24,000 man nao lo grup blo hem.
15 Heldai, datfala Netophathite, from laen blo Othniel, hem leader blo mek-12 grup lo mek-12 month, and 24,000 man nao lo grup blo hem.
16 Diswan nao hem olketa leader lo olketa tribe blo Israel: Lo tribe blo Reuben, Eliezer son blo Zichri nao hem leader. Lo tribe blo Simeon, hem Shephatiah, son blo Maacah.
17 Lo tribe blo Levi, hem Hashabiah, son blo Kemuel. Lo laen blo Aaron, hem Zadok.
18 Lo tribe blo Judah, hem Elihu, wanfala lo olketa brata blo David. Lo tribe blo Issachar, hem Omri, son blo Michael.
19 Lo tribe blo Zebulun, hem Ishmaiah, son blo Obadiah. Lo tribe blo Naphtali, hem Jerimoth, son blo Azriel.
20 Lo tribe blo Ephraim, hem Hoshea, son blo Azaziah. Lo haf lo tribe blo Manasseh, hem Joel, son blo Pedaiah.
21 Lo haf lo tribe blo Manasseh lo Gilead, hem Iddo, son blo Zechariah. Lo tribe blo Benjamin, hem Jaasiel, son blo Abner.
22 Lo tribe blo Dan, hem Azarel, son blo Jeroham. Olketa hia hem olketa leader lo olketa tribe blo Israel.
23 David no kaontem olketa wea 20 years old and go daon, bikos Jehovah bin promis for mekem Israel for kamap staka olsem olketa star lo skae.
24 Joab son blo Zeruiah hem start for kaontem olketa man, bat hem no finisim. And God kros tumas lo Israel bikos lo diswan, so olketa no raetem daon namba blo olketa man wea olketa kaontem lo buk abaotem history lo taem blo King David.
25 Azmaveth, son blo Adiel, hem lukaftarem olketa riches blo king. Jonathan, son blo Uzziah, hem lukaftarem olketa stoahaos aotsaed olketa taon, insaed olketa taon, lo olketa vilij, and lo olketa taoa.
26 Ezri, son blo Chelub, hem lukaftarem olketa wakaman wea waka lo garden.
27 Shimei, datfala Ramathite, hem lukaftarem olketa grape planteison. Zabdi, datfala Shiphmite, hem lukaftarem olketa stoahaos wea olketa putim olketa grape for wakem wine.
28 Baal-hanan, datfala Gederite, hem lukaftarem olketa olive planteison and olketa sycamore* tree lo Shephelah. Joash hem lukaftarem olketa ples for keepim oil.
29 Shitrai, datfala Sharonite, hem lukaftarem olketa buluka wea kaikai grass lo Sharon, and Shaphat, son blo Adlai, hem lukaftarem olketa buluka lo olketa valley.*
30 Obil, datfala Ishmaelite, hem lukaftarem olketa camel. Jehdeiah, datfala Meronothite, hem lukaftarem olketa donkey.*
31 Jaziz, datfala Hagrite, hem lukaftarem olketa sheepsheep. Evriwan hia hem olketa leader wea lukaftarem evriting blo King David.
32 Jonathan, nephew blo David, hem wanfala advaesa, man wea garem gud tingting and hem wanfala secretary, and Jehiel, son blo Hachmoni, hem lukaftarem olketa son blo king.
33 Ahithophel hem advaesa blo king, and Hushai, datfala Archite, hem fren* blo king.
34 Bihaen Ahithophel, Jehoiada, son blo Benaiah, and Abiathar kamap advaesa blo king. And Joab hem komanda lo army blo king.
Olketa footnote
^ Or, “fig mulberry tree.”
^ Or, “olketa flat ples.”
^ Heb., “olketa mere donkey.”
^ Or, “gud fren.”
