First Buk blo Kings 6:1-38
6 Lo mek-480 year bihaen olketa Israelite* kamaot from Egypt, lo mek-foa year bihaen Solomon hem king lo Israel, and lo month blo Ziv* (diswan hem mek-tu month), hem start for buildim haos blo Jehovah.*
2 Temple wea Solomon buildim for Jehovah hem 60 cubit* long, waed blo hem 20 cubit, and hae blo hem 30 cubit.
3 Varanda lo front lo temple* hem 20 cubit long,* semsem olsem waed blo datfala haos.* Long blo hem ten cubit.
4 Hem wakem olketa window frame lo datfala haos wea aotsaed hem smol and insaed hem waed.
5 Then hem buildim tu wanfala extension wall wea hem go raonem datfala temple* and datfala barava rum insaed,* then hem wakem olketa rum insaed lo datfala extension wall raonem datfala haos.
6 First floor blo olketa rum lo datfala extension wall hem faev cubit waed, mek-tu floor hem six cubit waed, and mek-thri floor hem seven cubit waed. For mek sure no eni samting hem tasim olketa wall blo temple, olketa mekem spes lo wall wea olketa beam savve sidaon antap and no tasim wall.
7 Olketa wakem haos hia witim olketa ston wea olketa bin katem and redyim finis, mekem taem olketa wakem datfala haos no eniwan herem noes blo olketa hammer or olketa ax or eni iron tul.
8 Door lo first floor blo datfala extention wall wea garem olketa rum, hem lo south* saed lo datfala haos, and hem garem wanfala ladder wea go raon insaed for go ap lo mek-tu floor, and from mek-tu floor hem go raon for go ap lo mek-thri floor.
9 Hem wakem haos ia gogo hem finisim, then lo ruf blo datfala haos, hem iusim olketa row blo cedar timba and olketa beam from cedar tree.
10 Hem wakem olketa rum raonem full haos, hae blo each rum hem faev cubit, and olketa iusim cedar timba for joinim olketa rum hia witim datfala haos.
11 Then Jehovah sei olsem lo Solomon:
12 “Mi laek story abaotem disfala haos lo iu, sapos iu followim olketa law blo mi, keepim olketa rul blo mi, and obeyim olketa komandment blo mi, then olketa samting wea mi promisim lo dadi blo iu David bae mi duim for iu tu,
13 and mi bae stap witim olketa Israelite, and mi bae no lusim pipol blo mi Israel.”
14 Solomon gohed for wakem haos hia and hem finisim.
15 Hem wakem walling insaed lo haos witim olketa cedar timba. Hem wakem olketa timba panel for olketa wall insaed lo haos start lo floor go kasem olketa rafta lo ceiling, then hem kavarem floor witim olketa timba blo juniper tree.
16 And lo end blo datfala temple hem wakem wanfala rum from olketa cedar timba wea hem 20 cubit square, start lo floor go kasem olketa rafta. And datwan nao hem barava rum insaed,* wea hem Most Holy Rum.
17 And datfala temple* wea hem front part blo datfala haos hem 40 cubit.
18 Olketa karvem olketa raon frut* and olketa flaoa, lo datfala cedar timba insaed lo temple. Olketa kavarem evri samting witim cedar timba gogo no eni ston showaot.
19 And hem redyim datfala barava rum insaed* lo haos for putim ark blo covenant blo Jehovah.
20 Datfala barava rum insaed* hem 20 cubit long, waed blo hem 20 cubit, and hae blo hem 20 cubit. And hem coatim lo pure gold. Datfala altar hem kavarem lo cedar timba.
21 Solomon coatim insaed lo datfala haos witim pure gold, and hem putim gold chain akros lo front blo datfala barava rum insaed wea gold kavarem.
22 Hem coatim full haos lo gold. And tu, hem coatim datfala full altar wea stap klosap lo barava rum insaed lo gold.
23 Hem wakem tufala cherub from pine tree,* each wan hem ten cubit hae and putim lo datfala barava rum insaed.
24 Long blo wanfala wing blo wanfala cherub hem faev cubit, and long blo nara wing hem faev cubit. From end blo wing blo wanfala cherub go kasem end blo nara wing blo hem, hem ten cubit.
25 Nara cherub tu wing blo hem ten cubit. Lukluk and size blo tufala cherub hia hem semsem.
26 Hae blo tufala cherub evriwan hem ten cubit.
27 Then hem standapim tufala cherub tugeta lo datfala barava rum insaed.* Hem mekem wing blo wanfala cherub tasim wing blo nara cherub lo midol lo datfala rum, then wing blo wanfala cherub hem go tasim wansaed wall, and wing blo narawan go tasim narasaed wall.
28 And hem coatim tufala cherub hia lo gold.
29 And lo olketa wall blo rum insaed and olketa wall blo rum aotsaed lo datfala haos, hem karvem piksa blo olketa cherub, olketa palm tree, and olketa flaoa.
30 Hem coatim floor blo insaed rum and aotsaed rum blo datfala haos lo gold.
31 And hem wakem tufala door for go insaed lo barava rum insaed from pine tree, hem wakem olketa post lo saed and olketa post lo door, wea datwan hem mek-faev part.*
32 Hem wakem tufala door from pine tree and hem karvem olketa cherub, olketa palm tree, and olketa flaoa lo door and hem coatim witim gold. And hem hamarem gold go daon ovam olketa cherub and olketa palm tree.
33 For go insaed datfala temple,* hem mekem olketa post lo door from pine tree, wea datwan hem mek-foa part.*
34 And hem mekem tufala door from juniper tree. Wanfala door garem tufala haf wea garem hinge wea savve mekem door swing open and sat, and nara door garem tufala haf wea garem hinge wea savve mekem door swing open and sat.
35 Hem karvem piksa blo olketa cherub, olketa palm tree, and olketa flaoa lo olketa door hia and coatim lo gold.
36 Hem wakem datfala courtyard insaed witim thrifala row blo olketa ston wea olketa katem finis and wanfala row blo olketa beam blo cedar tree.
37 Lo mek-4 year, lo month blo Ziv,* olketa wakem finis faondeson lo haos blo Jehovah.
38 And lo mek-11 year, lo month blo Bul* (wea hem mek-eit month), olketa finisim datfala haos and followim evri samting wea stap lo datfala plan. So hem tekem hem seven years for finisim datfala haos.
Olketa footnote
^ Heb., “olketa son blo Israel.”
^ Lukim App. B15.
^ Lukim App. B8.
^ Wan cubit equals 44.5 cm (17.5 in.). Lukim App. B14.
^ Heb., “temple blo datfala haos.”
^ Or, “waed.”
^ Or, “20 cubit go akros lo datfala haos.”
^ Or, “Holy Rum.”
^ Diswan hem Most Holy Rum.
^ Heb., “raet.”
^ Diswan hem insaed lo haos.
^ Diswan hem Holy Rum, wea stap front lo Most Holy Rum.
^ Heb., “olketa gourd.”
^ Diswan hem Most Holy Rum.
^ Diswan hem Most Holy Rum.
^ Heb., “oil tree,” maet hem Aleppo pine.
^ Diswan hem Most Holy Rum.
^ Maet datwan minim hao olketa wakem datfala door frame or hem size blo olketa door hia.
^ Diswan hem minim Holy Rum.
^ Maet datwan minim hao olketa wakem datfala door frame or hem size blo olketa door hia.
^ Lukim App. B15.
^ Lukim App. B15.
