First Buk blo Kings 7:1-51
7 Hem tekem 13 years for Solomon buildim haos* blo hem and for finisim.
2 And hem buildim haos wea olketa kolem lo Forest blo Lebanon. Long blo datfala haos hem 100 cubit,* waed blo hem 50 cubit, and hae blo hem 30 cubit, and hem buildim antap fofala row blo olketa post blo cedar tree. And hem putim olketa beam blo cedar timba antap olketa post hia.
3 Hem kavarem olketa beam witim olketa cedar timba wea go akros and olketa sidaon antap olketa post hia. Total blo olketa hem 45, and 15-fala nao lo each row.
4 Hem garem thrifala row lo olketa window wea garem frame, and lo thrifala row window hia, each window hem opposite lo narawan.
5 Evri door witim olketa post lo door olketa garem square* frame, semsem tu witim thrifala row window wea garem frame wea stap opposite lo narawan.
6 And hem buildim Hall* blo Olketa Post, wea long blo hem 50 cubit, and waed blo hem 30 cubit, and hem garem wanfala varanda lo front wea garem olketa post and wanfala ruf for kavarem.
7 And tu, hem buildim Hall* blo Throne, wea hem savve iusim for judge, wea hem nao Hall blo Judgment, and hem iusim cedar timba for walling lo datfala haos start lo floor go kasem olketa rafta.
8 Hem buildim haos* wea hem bae stap lo hem lo nara courtyard lo narasaed lo datfala Hall blo Judgment,* and hem semsem olsem datfala Hall. Solomon buildim tu wanfala haos for dota blo Pharaoh wea hem maritim wea semsem olsem datfala Hall.
9 Olketa buildim olketa haos hia lo olketa expensive ston wea olketa measurem, and katem insaed and aotsaed blo olketa ston hia finis witim stonesaw. Olketa iusim olketa ston hia for buildim faondeson go kasem last level lo ston antap, and lo aotsaed blo olketa haos hia go kasem big courtyard.*
10 And olketa wakem faondeson blo olketa haos hia lo olketa big and expensive ston. Samfala ston hem ten cubit and olketa narawan hem eit cubit.
11 And antap lo faondeson olketa iusim olketa expensive ston wea olketa katem and measurem finis, and olketa cedar timba tu.
12 Olketa wakem wall blo datfala big courtyard, witim thrifala row blo olketa ston wea olketa katem finis, and wanfala row blo olketa beam blo cedar tree, semsem olsem wall blo courtyard lo insaed wea go raonem haos blo Jehovah and varanda blo haos.
13 King Solomon sendem toktok lo Hiram lo Tyre for hem kam.
14 Hem son blo wanfala widow woman lo tribe blo Naphtali, and dadi blo hem from Tyre, hem man for wakem samting lo copper. Hiram savve tumas and garem experience for wakem staka difren kaen samting lo copper.* So hem kam lo King Solomon and duim evri waka for hem.
15 Hem meltim copper for wakem tufala big post, hae blo each post hem 18 cubit, and for measurem raon blo each big post hem 12 cubit long.*
16 And hem meltim copper for wakem tufala hed blo post for stap antap lo tufala big post hia. Hae blo wanfala hed blo post hem faev cubit, and hae blo nara hed blo post hem faev cubit.
17 Hed blo post wea stap antap lo each big post garem design blo net wea garem olketa smol chain raonem. Sevenfala chain lo wanfala hed blo post and sevenfala lo nara hed blo post.
18 And hem wakem tufala row blo pomegranate frut for go raonem each net wea decoratem tufala hed blo post wea stap antap tufala big post hia. Hem duim datwan for tufala hed blo post evriwan.
19 Tufala hed blo post wea stap antap lo tufala big post hia, hem garem design blo lily flaoa wea hem foa cubit hae.
20 Tufala hed blo post hem stap antap tufala big post hia and tufala stap antap ples wea datfala net go raonem. And tufala row blo 200 pomegranate frut nao raonem each hed blo post.
21 Hem standapim tufala big post wea stap front lo varanda blo temple.* Hem standapim big post lo raet saed* and hem kolem lo Jachin,* then hem standapim big post lo left saed* and hem kolem lo Boaz.*
22 And hem designim lily flaoa lo antap part blo tufala big post hia. So hem finisim nao tufala big post hia.
23 Then hem meltim copper for wakem wanfala big basin for wata, and kolem lo copper Sea.* Sheip blo hem raon, wansaed go kasem narasaed hem 10 cubit long, and 5 cubit hae, and for measurem raon blo hem, hem 30 cubit long.*
24 And hem garem karving blo olketa smol raon frut wea go raonem copper Sea hia. Lo wanfala cubit hem garem tenfala lo olketa smol raon frut hia, and hem meltim tufala row blo olketa smol raon frut hia and hem kamap part nao lo datfala basin.
25 Hem stap antap 12-fala bull, 3-fala feis go lo north, 3-fala feis go lo west, 3-fala feis go lo south, and 3-fala feis go lo east, and baksaed blo olketa evriwan tane go lo midol.
26 Thik blo copper Sea hia, hem wanfala handbreadth.* And olketa mekem mouth blo hem raon olsem kap, olsem lily flaoa wea open. Hem savve holem 44,000 liter* lo wata.
27 Then hem mekem tenfala cart lo copper* wea garem olketa wheel. Long blo each cart hem foa cubit, waed blo hem foa cubit, and hae blo hem thri cubit.
28 Diswan nao hao hem wakem olketa cart hia: Hem garem olketa panel lo saed and olketa panel hia hem stap between olketa frame wea go akrosim each other.
29 And lo saed lo olketa panel wea stap between olketa frame hem garem olketa lion, olketa bull, and olketa cherub, and olketa sem design hem stap tu lo olketa frame hia. Lo antap and andanit lo olketa lion and olketa buluka hia hem garem olketa flaoa wea olketa decoratem wea hem raon.
30 And each cart garem fofala copper wheel and olketa copper axle, and fofala frame lo each kona holem olketa wheel and axle hia. Andanit lo datfala big basin hem garem tufala samting lo each saed wea garem olketa flaoa wea olketa decoratem wea hem raon wea datfala basin stap antap.
31 Lo mouth blo datfala basin hem garem kraon raonem and hem wan cubit hae, start lo botom lo datfala basin go ap kasem mouth blo hem, hem wan and haf cubit hae, and hem garem olketa design. And olketa panel lo saed hem square, hem no raon.
32 Fofala wheel hem andanit lo olketa panel lo saed, and olketa frame wea holem olketa wheel hia hem join go lo datfala cart. Hae blo each wheel hem wan and haf cubit.
33 And olketa wheel hia hem olsem olketa wheel blo chariot. Hem meltim copper for wakem olketa frame,* olketa rim, olketa spoke,* and olketa hub.*
34 Lo fofala kona blo each cart hem garem fofala frame, and hem meltim copper for wakem olketa frame hia wea hem kamap part blo datfala cart.
35 Antap lo cart hem garem wanfala kraon wea hae blo hem haf cubit, and hem meltim copper for wakem olketa frame and panel lo saed kraon hia wea kamap part lo datfala cart.
36 Saed lo olketa frame blo datfala kraon and olketa panel wea stap lo saed, hem karvem olketa cherub, olketa lion, and olketa palm tree lo spes raonem datfala kraon, witim olketa flaoa wea olketa decoratem wea hem raon.
37 Diswan nao hao hem wakem tenfala cart hia. Hem meltim copper for wakem evri cart hia for evriwan semsem, mekem olketa garem sem measurement and evriwan luk semsem.
38 Hem wakem tenfala copper basin. Each wan savve holem 880 liter* lo wata. Lo wansaed go kasem narasaed lo each basin hem foa cubit. Each wan lo tenfala cart hia garem wanfala basin.
39 Then hem putim faevfala cart lo raet saed blo datfala haos and nara faevfala lo left saed blo datfala haos, and hem putim datfala copper Sea lo raet saed blo haos wea feis go lo south east.
40 Hiram wakem tu olketa basin, olketa savol, and olketa bowl. So Hiram finisim evri waka wea hem duim for King Solomon lo haos blo Jehovah. Diswan nao olketa samting wea hem bin wakem:
41 Tufala big post and tufala hed blo post wea sheip olsem bowl wea stap antap tufala big post hia. Tufala net for decoratem tufala hed blo post wea stap antap lo tufala big post.
42 And 400 pomegranate frut for tufala net hia, tufala row blo pomegranate frut for each net wea decoratem tufala hed blo post wea sheip olsem bowl wea stap antap lo tufala big post hia.
43 Tenfala cart and tenfala basin wea stap lo olketa cart hia.
44 Datfala copper Sea and 12-fala bull andanit lo copper Sea.
45 And olketa smol pot, olketa savol, olketa bowl, and evri samting wea Hiram wakem lo copper wea shaen. Hem wakem evri samting hia for King Solomon for haos blo Jehovah.
46 King talem olketa for meltim copper and iusim clay mold lo distrik blo Jordan, between Succoth and Zarethan for wakem lo olketa samting hia.
47 Solomon no weim evri samting hia bikos olketa staka tumas. No eniwan savve lo weight blo olketa copper hia.
48 Evri samting hia nao Solomon wakem for haos blo Jehovah: Altar blo gold, tebol blo gold for putim showbred.*
49 Olketa lampstand wea olketa wakem lo pure gold, faevfala lo raet saed and faevfala lo left saed wea stap front lo barava rum insaed.* And olketa flaoa, olketa lamp, and olketa tongs wea olketa wakem lo gold.
50 Olketa basin, olketa tul olsem scissors for katemaot wick wea laet, olketa bowl, olketa kap, and olketa fire holder* wea olketa wakem lo pure gold. And olketa socket for olketa door lo barava rum insaed, wea hem Most Holy Rum, and olketa wakem tu olketa door lo haos blo temple lo gold.
51 So King Solomon finisim evri waka wea hem mas duim lo haos blo Jehovah. Then Solomon tekem kam olketa samting wea dadi blo hem David bin mekem holy, and hem putim olketa silver, gold, and olketa nara expensive samting lo ples for keepim olketa riches lo haos blo Jehovah.
Olketa footnote
^ Or, “palace.”
^ Wan cubit equals 44.5 cm (17.5 in.). Lukim App. B14.
^ Or, “fofala kona. Rectangular.”
^ Or, “Varanda.”
^ Or, “Varanda.”
^ Or, “palace.”
^ Heb., “haos blo datfala Hall.”
^ Wea hem courtyard lo aotsaed.
^ Or, “brass,” lo hia and lo eni nara verse lo disfala chapter.
^ Or, “raon blo each big post hem 12 cubit.”
^ Or, “north saed.”
^ Maet mining blo hem “Witim Paoa.”
^ Mining blo hem, “Hem [diswan hem Jehovah] Barava Mekem Strong.”
^ Or, “south saed.”
^ Diswan hem Holy Rum.
^ Or, “tank.”
^ Or, “raon blo hem 30 cubit.”
^ Wanfala handbreadth hem samting olsem 7.4 cm (2.9 in.). Lukim App. B14.
^ Heb., “2,000 bath.” Wanfala bath equals 22 L (5.81 gal). Lukim App. B14.
^ Or, “olketa cart for wata.”
^ Or, “support.” Diswan hem joinim hub go lo axle blo wheel.
^ Hem bar wea join go lo midol blo datfala wheel.
^ Hem midol part lo wheel.
^ Heb., “40 bath.” Lukim App. B14.
^ Lukim “Showbred” lo Dictionary.
^ Diswan hem Most Holy Rum.
^ Lukim “Fire Holder” lo Dictionary.
