1 Samuel 31:1-13
-
Saul and thrifala son blo hem dae (1-13)
31 Olketa Philistine faet againstim olketa blo Israel. And olketa man lo Israel ranawe from olketa Philistine, and olketa killim dae staka Israelite lo Maunt Gilboa.
2 Olketa Philistine ronem Saul and olketa son blo hem, and olketa killim dae Jonathan, Abinadab, and Malchi-shua, wea hem olketa son blo Saul.
3 Faet hia kamap strong and olketa man for sut lo bow and arrow lukim Saul and sutim hem, and Saul garekil nogud.
4 Then Saul sei lo man wea karem weapon blo hem: “Tekem sword blo iu and killim mi dae, mekem olketa man hia wea no circumcise bae no kam and duim nogud samting lo mi and killim mi dae.” Bat man hia no laek duim wanem Saul talem bikos hem fraet fogud. So Saul tekem sword and killim dae hemseleva.
5 Taem man hia lukim Saul hem dae, hem tu tekem sword blo hem and killim dae hemseleva.
6 So Saul, thrifala son blo hem, man wea karem weapon blo hem, and evri bodygard blo hem olketa dae lo datfala day.
7 Taem pipol lo Israel wea stap lo olketa ples lo valley and lo olketa area raonem Jordan River faendaot olketa soldia blo Israel ranawe, and Saul and olketa son blo hem dae, olketa lusim olketa taon blo olketa and olketa ranawe. Then olketa Philistine go and stap lo olketa taon hia.
8 Lo next day, taem olketa Philistine go for tekem evriting blo olketa man wea dae, olketa lukim Saul and thrifala son blo hem dae finis lo Maunt Gilboa.
9 So olketa katemaot hed blo Saul, aotem kaleko blo hem for faet, and sendem nius go lo evri ples blo olketa Philistine mekem olketa storyim samting wea happen insaed olketa haos* blo olketa idol blo olketa and lo evri pipol.
10 Then olketa putim kaleko blo hem for faet lo haos blo olketa image blo Ashtoreth, and olketa hangem dead body blo hem lo wall lo Beth-shan.
11 Taem pipol lo Jabesh-gilead herem samting wea olketa Philistine duim lo Saul,
12 evri man for faet getap and wakabaot full naet and aotem body blo Saul and olketa son blo hem from datfala wall lo Beth-shan. Then olketa go bak lo Jabesh and bonem body blo olketa lo there.
13 Then olketa tekem bon blo olketa and berem andanit lo tamarisk tree lo Jabesh, and olketa fasting for sevenfala day.
Olketa footnote
^ Or, “olketa temple.”
