2 Chronicles 3:1-17
3 Then Solomon start for buildim haos blo Jehovah lo Jerusalem lo Maunt Moriah, hem ples wea Jehovah kam lo dadi blo hem David. David bin redyim disfala ples, wea hem ples for aotem wheat from skin blo hem, wea hem blo Ornan datfala Jebusite.
2 Hem start for build lo mek-foa year wea hem rul, lo mek-tu day blo mek-tu month.
3 And Solomon wakem faondeson blo haos blo tru God, followim measurement wea olketa iusim bifor,* wea hem 60 cubit* long and waed blo hem 20 cubit.
4 Varanda lo front hem 20 cubit long, semsem olsem waed blo datfala haos,* and hae blo hem 120,* and hem coatim insaed lo hem witim pure gold.
5 Hem wakem walling insaed datfala big rum* witim timba blo juniper tree, bihaen hem coatim witim pure gold, and then hem karvem piksa blo olketa palm tree and olketa chain for decoratem.
6 And tu, hem kavarem datfala haos witim olketa naes spesol ston, and gold wea hem iusim, hem kam from Parvaim.
7 Hem iusim gold for kavarem datfala haos, olketa rafta, floor andanit lo olketa door, olketa wall, and lo olketa door. And hem karvem piksa blo olketa cherub lo olketa wall.
8 Then hem wakem datfala Most Holy Rum.* Long blo hem 20 cubit semsem olsem waed blo hem 20 cubit. Hem kavarem insaed datfala rum witim 600 talent* blo pure gold.
9 Weight blo gold wea hem iusim for wakem olketa nila hem 50 shekel.* And hem iusim gold for kavarem olketa rum antap lo ruf.
10 Then hem wakem karving blo tufala cherub and putim insaed lo Most Holy Rum,* and hem coatim tufala witim gold.
11 Long blo olketa wing blo tufala cherub hia tugeta hem 20 cubit. Wanfala wing blo first cherub, hem faev cubit long and hem tasim wall blo haos, and nara wing hem faev cubit long and hem tasim wanfala wing blo nara cherub.
12 And wanfala wing blo mek-tu cherub, hem faev cubit long and hem tasim narasaed wall blo haos, and nara wing hem faev cubit long and hem tasim wanfala wing blo datfala first cherub.
13 Olketa wing blo tufala cherub hia wea tufala openem hem 20 cubit long. And tufala standap stret and feisim go Holy Rum.
14 And tu, hem wakem datfala curtain lo blue wool, purple wool, dark red wool, and gud quality material, and soengim olketa design blo cherub lo hem.
15 Then hem wakem tufala big post front lo datfala haos, long blo each wan hem 35 cubit, and hed blo post wea stap antap lo each wan lo tufala big post hia hem faev cubit.
16 And hem wakem olketa chain, olsem olketa nekles, and putim antap lo tufala big post hia, and hem mekem 100 pomegranate frut and putim lo olketa chain hia.
17 Hem standapim tufala big post hia front lo temple, wanfala lo raet saed* and wanfala lo left saed.* Hem kolem datwan lo raet saed Jachin* and datwan lo left saed Boaz.*
Olketa footnote
^ Wan cubit equals 44.5 cm (17.5 in.), bat samfala tingse “measurement wea olketa iusim bifor,” hem minim longfala cubit hem 51.8 cm (20.4 in.). Lukim App. B14.
^ Wan cubit equals 44.5 cm (17.5 in.). Lukim App. B14.
^ Or, “20 cubit go akros lo datfala haos.”
^ No sure lo measurement blo hem.
^ Heb., “datfala big haos,” maet diswan hem Holy Rum.
^ Heb., “haos.”
^ Wanfala talent equals 34.2 kg. Lukim App. B14.
^ Wanfala shekel equals 11.4 g. Lukim App. B14.
^ Heb., “haos.”
^ Or, “south saed.”
^ Or, “north saed.”
^ Mining blo hem, “Hem [diswan hem Jehovah] Barava Mekem Strong.”
^ Maet mining blo hem “Witim Paoa.”
