Mek-tu Leta blo John 1:1-13
1 Mi nao datfala elder* and mi raet kam long iu. Mi raet kam long iu, datfala woman wea God chusim,* and olketa pikinini bilong iu. Mi barava lovem iufala. Hem no mi nomoa wea lovem iufala, bat evriwan wea savve long olketa tru teaching lovem iufala tu.
2 Mifala lovem iufala bikos long olketa tru teaching wea stap long heart bilong mifala, wea mifala bae garem for olowe.
3 God, wea hem dadi long heven, witim Son bilong hem, Jesus Christ, bae givim long iumi olketa tru teaching hia and bae hem lovem iumi. Bae hem barava kaen long iumi, bae hem showimaot mercy long iumi, and bae hem helpem iumi for garem peace.
4 Mi hapi tumas bikos mi herem samfala pikinini bilong iu followim olketa tru teaching, olsem Dadi long heven talem iumi for duim.
5 So sista, mi no askem iu for followim wanfala niu law distaem, bat mi askem iu for followim datfala law wea iumi kasem finis taem iumi start for lane abaotem Christ. Datfala law hem sei iumi mas lovem iumi evriwan.
6 Sapos iumi garem disfala love, iumi gohed for obeyim olketa law bilong hem. Disfala law wea iufala herem long firstaem hem sei iufala mas gohed for showimaot love.
7 Staka man for laea stap long disfala world wea sei Jesus Christ hem no kamap man. Olketa wea talem olsem olketa nao man for laea and olketa againstim Christ.*
8 Keakea long wanem iufala duim, mekem iufala no lusim olketa samting wea mifala waka hard for hem. Then iufala bae kasem evri blessing wea God redyim for iufala.
9 Eniwan wea go difren from teaching bilong Christ and wea no gohed followim datwan hem no wan mind witim God. Man wea gohed followim disfala teaching hem wan mind witim Dadi long heven and Son bilong hem.
10 Sapos eniwan hem kam long iufala and hem no tekem kam disfala teaching, iufala mas no welkamim hem for kam insaed haos bilong iufala and iufala mas no sei hello long hem.
11 Man wea sei hello long hem, hem join insaed nogud samting wea datfala man duim.
12 Nomata mi laek talem staka samting long iufala, mi no laek for raetem long disfala leta. Bat mi hope bae mi kam long iufala and story witim iufala, mekem iufala barava hapi.
13 Olketa pikinini bilong sista bilong iu, wea God chusim hem, olketa talem kam hello for iu.
Olketa footnote
^ Or, “olo man.”
^ Maet datfala “woman wea God chusim” hem minim wanfala woman or wanfala Christian kongregeson long first century.
^ Long English hem sei, “antichrist.” Lukim “Antichrist” long Dictionary.
