Mek-tu Buk blo Kings 14:1-29
14 Lo mek-tu year lo rul blo Jehoash son blo Jehoahaz king blo Israel, Amaziah wea hem son blo King Jehoash blo Judah hem kamap king.
2 Hem 25 years old taem hem kamap king, and hem rul lo Jerusalem for 29 years. Nem blo mami blo hem Jehoaddin, and hem from Jerusalem.
3 Hem gohed for duim samting wea stret lo eye blo Jehovah, bat no olsem grandadi blo hem David. Hem gohed for duim nomoa olketa samting wea dadi blo hem Jehoash hem bin duim.
4 Bat olketa hae ples* still stap, and olketa pipol still mekem sakrifaes and mekem smoke blo sakrifaes go ap lo olketa hae ples hia.
5 Semtaem hem tekova lo datfala kingdom and hem rul, hem killim dae olketa servant blo hem wea bin killim dae dadi blo hem wea king.
6 Bat hem no killim dae olketa son blo olketa wea killim dae dadi blo hem, diswan followim komandment blo Jehovah wea stap insaed buk blo Law blo Moses wea sei: “Olketa dadi shud no dae for sin wea olketa pikinini blo olketa duim, and olketa pikinini shud no dae for sin wea olketa dadi blo olketa duim. Bat iufala shud killim dae nomoa samwan for sin wea hemseleva duim.”
7 Hem faet againstim olketa lo Edom lo Valley blo Solt, and killim dae 10,000 man, and hem tekovarem Sela lo datfala faet, and nemim lo Joktheel, and nem hia stap kam kasem distaem.
8 Then Amaziah sendem samfala messenger go lo Jehoash, son blo Jehoahaz, wea hem son blo Jehu, king blo Israel, and sei: “Iu kam, mekem iumi faetem each other.”*
9 King Jehoash blo Israel sendem toktok hia lo King Amaziah blo Judah and sei: “Nila grass lo Lebanon sendem toktok hia lo cedar tree lo Lebanon, ‘Iu givim kam dota blo iu for kamap waef blo son blo mi.’ Bat wanfala wild animal lo Lebanon hem go pas and hem stepim datfala nila grass.
10 Hem tru, iu killim dae olketa man lo Edom and heart blo iu kamap praod. Iu hapi lo faet wea iu winim, bat iu stap kwaet lo haos* blo iu. Why nao iu shud mek trabol and foldaon, for mekem Judah go daon witim iu?”
11 Bat Amaziah nating lisin.
So King Jehoash blo Israel go ap, and hem and King Amaziah blo Judah faetem each other lo Beth-shemesh, wanfala taon lo Judah.
12 Olketa blo Israel winim olketa blo Judah, so each wan ranawe go bak lo ples* blo hem.
13 King Jehoash blo Israel kasholem King Amaziah blo Judah, son blo Jehoash, wea hem son blo Ahaziah, lo Beth-shemesh. Then olketa kam lo Jerusalem and hem brekem daon wall lo Jerusalem start from Gate blo Ephraim go kasem Kona Gate, datwan hem 400 cubit.*
14 Bihaen, hem tekem evri gold and silver and evri nara samting wea hem faendem lo haos blo Jehovah, and olketa riches lo haos* blo king, and tu, hem tekem samfala man olsem prisoner. Then hem go bak lo Samaria.
15 Evri nara samting abaotem Jehoash, wanem hem bin duim, and olketa big samting wea hem duim, and hao hem faet againstim King Amaziah blo Judah, olketa raetem insaed buk blo history blo olketa king blo Israel.
16 Then Jehoash hem rest witim olketa grandadi blo hem, and olketa berem hem lo Samaria witim olketa king blo Israel, and son blo hem Jeroboam* kamap king for changem hem.
17 Amaziah son blo King Jehoash blo Judah hem laef for 15 years moa bihaen Jehoash son blo King Jehoahaz blo Israel hem dae.
18 Evri nara samting abaotem Amaziah, olketa raetem insaed buk blo history blo olketa king blo Judah.
19 Bihaen olketa mekem plan againstim hem lo Jerusalem, and hem ranawe go lo Lachish, bat olketa sendem samfala man for go aftarem hem lo Lachish, and killim hem dae lo there.
20 So olketa iusim olketa horse for karem body blo hem go bak lo Jerusalem, and olketa berem hem witim olketa grandadi blo hem lo Taon blo David.
21 Then evri pipol blo Judah tekem Azariah* wea 16 years old, and mekem hem kamap king for changem dadi blo hem Amaziah.
22 Hem winim bak Elath wea hem taon lo Judah, and hem buildim bak bihaen king* rest witim olketa grandadi blo hem.
23 Lo mek-15 year wea Amaziah son blo Jehoash king blo Judah hem rul, Jeroboam son blo King Jehoash blo Israel hem kamap king lo Samaria, and hem rul for 41 years.
24 Hem gohed for duim olketa samting wea nogud lo eye blo Jehovah, and hem no lusim olketa sin wea Jeroboam son blo Nebat bin duim, wea datwan mekem olketa lo Israel for duim sin.
25 Hem tekem bak baondri blo Israel start lo Lebo-hamath* go kasem Sea blo Arabah,* followim nao toktok wea Jehovah, God blo Israel talem lo servant blo hem Jonah son blo Amittai, wea hem profet from Gath-hepher.
26 From Jehovah bin lukim hard taem wea kasem Israel wea mekem olketa barava safa, hao no eniwan stap for helpem olketa, nomata olketa wea needim help or olketa wea no strong tu.
27 Bat Jehovah promisim dat hem bae no aotem nem blo Israel from andanit lo skae. So hem iusim Jeroboam son blo Jehoash for sevem olketa.
28 Evri nara samting abaotem Jeroboam, evri samting wea hem duim, and olketa big samting wea hem duim, and hao hem faet, and hao hem givim bak Damascus and Hamath lo Judah lo Israel, olketa raetem insaed buk blo history blo olketa king blo Israel.
29 Then Jeroboam hem rest witim olketa grandadi blo hem and olketa berem hem witim olketa king blo Israel, and son blo hem Zechariah kamap king for changem hem.
Olketa footnote
^ Lukim “Hae Ples” lo Dictionary.
^ Or, “feis tu feis.”
^ Or, “palace.”
^ Heb., “tent.”
^ Samting olsem 178 m (584 ft). Lukim App. B14.
^ Or, “palace.”
^ Diswan hem Jeroboam II.
^ Mining blo hem “Jehovah Hem Helpem.” Lo 2Ki 15:13; 2Ch 26:1-23; Isa 6:1; and Zec 14:5, olketa iusim Uzziah.
^ Diswan hem dadi blo hem Amaziah.
^ Or, “lo border blo Hamath.”
^ Diswan hem Salt Sea, or Dead Sea.
