Mek-tu Buk blo Kings 15:1-38
15 Lo mek-27 year lo rul blo King Jeroboam* blo Israel, Azariah* son blo King Amaziah blo Judah hem kamap king.
2 Hem 16 years old taem hem kamap king, and hem rul lo Jerusalem for 52 years. Nem blo mami blo hem Jecoliah, and hem from Jerusalem.
3 Hem gohed for duim samting wea stret lo eye blo Jehovah, olsem dadi blo hem Amaziah bin duim.
4 Bat olketa hae ples* still stap, and olketa pipol still mekem sakrifaes, and mekem sakrifaes for smoke lo olketa hae ples hia.
5 Jehovah mekem king hia for kasem leprosy, and leprosy hia stap lo hem go kasem day wea hem dae. And hem stap seleva lo wanfala haos, and Jotham son blo king lukaftarem haos,* and judgem* pipol lo datfala land.
6 Evri nara samting abaotem Azariah, evri samting wea hem duim, olketa raetem insaed buk blo history blo olketa king blo Judah.
7 Then Azariah rest witim olketa grandadi blo hem, and olketa berem hem witim olketa grandadi blo hem lo Taon blo David, and son blo hem Jotham kamap king for changem hem.
8 Lo mek-38 year lo rul blo King Azariah blo Judah, Zechariah son blo Jeroboam hem kamap king lo Samaria ovarem Israel, and hem rul for sixfala month.
9 Hem duim olketa samting wea nogud lo eye blo Jehovah, olsem olketa grandadi blo hem bin duim. Hem no lusim olketa sin wea Jeroboam son blo Nebat bin duim, wea datwan mekem olketa lo Israel for duim sin.
10 Then Shallum son blo Jabesh mekem plan againstim Zechariah, and killim hem dae lo Ibleam. Bihaen hem killim hem dae, hem kamap king for changem hem.
11 Evri nara samting abaotem Zechariah, olketa raetem insaed buk blo history blo olketa king blo Israel.
12 Datwan hem mekem toktok wea Jehovah talem lo Jehu hem kamap tru, wea sei: “Fofala genereson blo olketa son blo iu bae sidaon lo throne for king ovarem Israel.” And datwan nao samting wea happen.
13 Shallum son blo Jabesh kamap king lo mek-39 year lo rul blo King Uzziah blo Judah, and hem rul lo Samaria for wanfala full month.
14 Then Menahem son blo Gadi hem kam from Tirzah for go lo Samaria, and hem killim dae Shallum son blo Jabesh lo Samaria. Bihaen hem killim hem dae, hem kamap king for changem hem.
15 Evri nara samting abaotem Shallum and nogud plan wea hem bin mekem, olketa raetem insaed buk blo history blo olketa king blo Israel.
16 Lo datfala taem tu, Menahem kam from Tirzah and distroem Tiphsah, and killim dae evri pipol wea stap lo there and olketa taon wea stap raonem hem, bikos olketa no openem gate for hem. Hem distroem datfala taon, and olketa babule woman hem katem bele blo olketa.
17 Lo mek-39 year lo rul blo King Azariah blo Judah, Menahem son blo Gadi hem kamap king ovarem Israel, and hem rul lo Samaria for tenfala year.
18 Hem gohed for duim olketa samting wea nogud lo eye blo Jehovah. Lo full laef blo hem, hem no lusim olketa sin wea Jeroboam son blo Nebat bin duim, wea datwan mekem olketa lo Israel for duim sin.
19 Taem King Pul blo Assyria kam againstim land lo Israel, Menahem givim 1,000 talent* blo silver lo Pul, mekem Pul sapotim hem for mekem kingdom blo hem kamap strong.
20 So Menahem hem tekem silver from olketa man wea garem hae position, and olketa wea rich lo Israel, and tekem 50 silver shekel* and givim lo king blo Assyria for each man. Then king blo Assyria lusim Israel and go bak.
21 Evri nara samting abaotem Menahem, evri samting wea hem duim, olketa raetem insaed buk blo history blo olketa king blo Israel.
22 Then Menahem hem rest witim olketa grandadi blo hem, and son blo hem Pekahiah hem kamap king for changem hem.
23 Lo mek-50 year lo rul blo King Azariah blo Judah, Pekahiah son blo Menahem hem kamap king lo Samaria ovarem Israel, and hem rul for tufala year.
24 Hem gohed for duim olketa samting wea nogud lo eye blo Jehovah. Hem no lusim olketa sin wea Jeroboam, son blo Nebat bin duim, wea datwan mekem olketa lo Israel for duim sin.
25 Then Pekah son blo Remaliah wea hem bigman blo hem, mekem plan againstim hem and killim hem dae witim Argob and Arieh, lo Samaria lo strongfala taoa lo haos* blo king. Hem tekem 50-fala man lo Gilead witim hem, and bihaen Pekah killim dae king, hem kamap king for changem hem.
26 Evri nara samting abaotem Pekahiah, evri samting wea hem duim, olketa raetem insaed buk blo history blo olketa king blo Israel.
27 Lo mek-52 year lo rul blo King Azariah blo Judah, Pekah son blo Remaliah hem kamap king lo Samaria ovarem Israel, and hem rul for 20 years.
28 Hem gohed for duim olketa samting wea nogud lo eye blo Jehovah, and hem no lusim olketa sin wea Jeroboam, son blo Nebat bin duim, wea datwan mekem olketa lo Israel for duim sin.
29 Lo taem wea King Pekah blo Israel hem rul, King Tiglath-pileser blo Assyria hem kam and tekovarem Ijon, Abel-beth-maacah, Janoah, Kedesh, Hazor, Gilead, and Galilee, wea hem evri land lo tribe blo Naphtali, and hem tekem olketa pipol lo olketa taon hia, for go prisoner lo Assyria.
30 Then Hoshea son blo Elah mekem plan againstim Pekah son blo Remaliah, and hem killim hem dae. And hem kamap king for changem hem lo mek-20 year lo rul blo Jotham son blo Uzziah.
31 Evri nara samting abaotem Pekah, evri samting wea hem duim, olketa raetem insaed buk blo history blo olketa king blo Israel.
32 Lo mek-tu year lo rul blo Pekah, son blo Remaliah king blo Israel, Jotham son blo King Uzziah blo Judah hem kamap king.
33 Hem 25 years old taem hem kamap king, and hem rul lo Jerusalem for 16 years. Nem blo mami blo hem Jerusha, dota blo Zadok.
34 Hem gohed for duim samting wea stret lo eye blo Jehovah, olsem dadi blo hem Uzziah bin duim.
35 Bat olketa hae ples still stap, and olketa pipol still mekem sakrifaes and mekem sakrifaes for smoke lo olketa hae ples hia. Jotham nao wakem Hae Gate lo haos blo Jehovah.
36 Evri nara samting abaotem Jotham, wanem hem duim, olketa raetem insaed buk blo history blo olketa king blo Judah.
37 Lo datfala taem tu, Jehovah start for sendem Rezin king blo Syria, and Pekah son blo Remaliah for go and faetem Judah.
38 Then Jotham hem rest witim olketa grandadi blo hem, and olketa berem hem witim olketa grandadi blo hem lo Taon blo David, grandadi blo hem. And son blo hem Ahaz kamap king for changem hem.
Olketa footnote
^ Diswan hem Jeroboam II.
^ Mining blo hem “Jehovah Hem Helpem.” Lo 2Ki 15:13; 2Ch 26:1-23; Isa 6:1; and Zec 14:5, olketa iusim Uzziah.
^ Lukim “Hae Ples” lo Dictionary.
^ Or, “palace.”
^ Or, “rulim.”
^ Wanfala talent equals 34.2 kg. Lukim App. B14.
^ Wanfala shekel equals 11.4 g. Lukim App. B14.
^ Or, “palace.”
