Mek-tu Buk blo Kings 24:1-20
24 Lo taem blo Jehoiakim, King Nebuchadnezzar blo Babylon kam faet againstim hem, and Jehoiakim kamap servant blo hem for thrifala year. Bat hem tane raon and bighed againstim hem.
2 Then Jehovah start for sendem samfala man lo olketa blo Chaldea, Syria, Moab, and Ammon wea savve mek trabol for againstim Jehoiakim. Hem gohed for duim datwan for distroem Judah, followim toktok blo Jehovah wea hem iusim olketa profet wea hem olketa wakaman blo hem for talem.
3 Tru tumas, diswan hem happen lo Judah, barava olsem hao Jehovah talem dat hem bae aotem olketa, mekem hem no lukim olketa moa, bikos lo evri sin wea Manasseh bin duim,
4 and tu, Manasseh killim dae staka innocent pipol, gogo hem olsem Jerusalem hem fulap lo blood blo olketa innocent pipol hia, and Jehovah no willing for forgivim olketa.
5 Evri nara samting abaotem Jehoiakim, evri samting wea hem duim, olketa raetem insaed buk blo history blo olketa king blo Judah.
6 Then Jehoiakim hem rest witim olketa grandadi blo hem, and son blo hem Jehoiachin kamap king for changem hem.
7 No enitaem moa king blo Egypt sendem army for go aot from land blo hem bikos king blo Babylon hem tekem evri land blo king blo Egypt, start from Valley* lo Egypt go ap kasem Euphrates River.
8 Jehoiachin hem 18 years old taem hem kamap king, and hem rul lo Jerusalem for thrifala month. Nem blo mami blo hem Nehushta, dota blo Elnathan from Jerusalem.
9 Hem gohed for duim samting wea nogud lo eye blo Jehovah, followim evri samting wea dadi blo hem bin duim.
10 Lo datfala taem, olketa wakaman blo King Nebuchadnezzar blo Babylon kam againstim Jerusalem, and raonem datfala taon.
11 And King Nebuchadnezzar blo Babylon kam lo Jerusalem taem olketa wakaman blo hem raonem datfala taon.
12 King Jehoiachin blo Judah go aot for meetim king blo Babylon. Hem witim mami blo hem, olketa servant blo hem, olketa prince blo hem, and olketa hae official blo hem. And lo mek-eit year lo rul blo king blo Babylon, hem tekem Jehoiachin go prisoner.
13 Then hem tekem aot evri riches lo haos blo Jehovah and olketa riches lo haos* blo king. Hem kat pisisim evri samting wea olketa iusim lo temple blo Jehovah wea King Solomon blo Israel bin wakem lo gold, barava olsem hao Jehovah hem bin talem.
14 Hem tekem evriwan lo Jerusalem, evri prince, evri strong soldia, and evri man wea savve wakem samting lo wood and lo metal, hem tekem 10,000 for kamap prisoner. No eniwan lo olketa stap bihaen, olketa wea barava poor lo datfala land nomoa stap.
15 So hem tekem Jehoiachin for go prisoner lo Babylon. And tu, hem tekem mami blo king, olketa waef blo king, olketa hae official blo hem, and olketa important man lo datfala land, hem tekem olketa from Jerusalem for go prisoner lo Babylon.
16 King blo Babylon tekem tu evri man for faet go lo Babylon, evriwan hia hem 7,000, and hem tekem 1,000 man wea savve wakem samting from wood and olketa wea savve wakem samting from metal. Evri man hia olketa strong man wea kasem training for faet.
17 King blo Babylon markem Mattaniah, wea hem uncle blo Jehoiachin, for kamap king changem hem, and hem changem nem blo hem go lo Zedekiah.
18 Zedekiah hem 21 years old taem hem kamap king, and hem rul lo Jerusalem for 11 years. Nem blo mami blo hem Hamutal, dota blo Jeremiah from Libnah.
19 Hem gohed for duim samting wea nogud lo eye blo Jehovah, followim evri samting wea Jehoiakim bin duim bifor.
20 Jehovah hem kros tumas lo olketa, dastawe olketa samting hia happen lo Jerusalem and lo Judah, go kasem taem hem aotem olketa mekem hem no lukim olketa moa. And Zedekiah bighed againstim king blo Babylon.
