2 Samuel 8:1-18
8 Bihaen, David faetem olketa Philistine and winim olketa, and hem tekovarem Metheg-ammah from olketa Philistine.
2 Hem faet and winim olketa Moabite and mekem olketa leidaon lo graon and hem iusim rope for measurem olketa. Hem divaedem olketa lo olketa grup, tufala grup for olketa dae and wanfala grup for olketa stap laef. And olketa Moabite kamap servant blo David and olketa tekem present kam lo hem.
3 Taem King Hadadezer blo Zobah, wea hem son blo Rehob go for tek kontrol moa lo territory blo Euphrates River, David faetem and winim hem.
4 David tekem 1,700 man wea raed lo horse and 20,000 soldia from hem. Then David mekem evri horse hia for kripol, bat hem no duim datwan lo 100 horse wea savve pullim chariot.
5 Taem olketa lo Syria wea stap lo Damascus go for helpem King Hadadezer blo Zobah, David killim dae 22,000 lo olketa.
6 Then David putim olketa soldia lo Syria lo Damascus, and olketa lo Syria kamap servant blo David and tekem kam present for hem. Lo evri ples wea David go, Jehovah sevem hem.
7 And David tekem tu olketa gold shield wea raon from olketa servant blo Hadadezer, and hem tekem go lo Jerusalem.
8 King David tekem staka copper from tufala taon hia, Betah and Berothai, olketa taon blo Hadadezer.
9 So King Toi blo Hamath herem dat David winim evriwan lo army blo Hadadezer.
10 Then Toi sendem son blo hem Joram for go lo King David for ask abaotem hao nao hem, and for talem dat hem hapi from David winim Hadadezer. Hem tekem go olketa samting wea olketa wakem lo silver, gold, and copper. Datwan hem bikos staka taem Hadadezer bin faet againstim Toi.
11 King David givim evri samting hia lo Jehovah, witim tu olketa silver and gold wea hem tekem from evri nation wea hem faet againstim and winim,
12 olsem from olketa lo Syria and olketa lo Moab, olketa Ammonite, olketa Philistine, olketa Amalekite, and olketa samting wea hem tekem from Hadadezer king blo Zobah, wea hem son blo Rehob.
13 And tu, pipol mekhae lo David, bihaen hem killim dae 18,000 man blo Edom lo Valley blo Solt.
14 David putim olketa soldia lo Edom. Lo evri ples lo Edom, hem putim olketa soldia lo hem, and evriwan lo Edom kamap servant blo hem. Lo evri ples wea David go, Jehovah sevem hem.
15 David gohed rul ovarem evriwan lo Israel, and hem followim justice and duim stretfala samting taem hem rul ovarem pipol blo hem.
16 Joab, son blo Zeruiah hem komanda lo army, and Jehoshaphat, son blo Ahilud, hem man for keepim record blo king.
17 Zadok, son blo Ahitub, and Ahimelech, son blo Abiathar, tufala nao priest, and Seraiah hem secretary.
18 Benaiah, son blo Jehoiada, hem lukaftarem olketa Cherethite and olketa Pelethite. And olketa son blo David, olketa kamap chief minister.*
Olketa footnote
^ Heb., “kamap olketa priest.”
