Amos 6:1-14
6 “Nogud samting bae kasem olketa lo Zion wea tinghae lo olketa seleva,*Olketa wea feel sef lo maunten lo Samaria,Olketa bigman blo olketa strongfala nation,Olketa wea pipol lo Israel luk lo olketa for kasem help!
2 Iufala go lo Calneh and lukim.
From there go lo taon wea olketa kolem lo Great Hamath,And go daon lo Gath, taon blo olketa Philistine.
Hao, olketa gud winim olketa kingdom* hia,Or territory blo olketa big winim territory blo iufala?
3 Hao, iufala les for tingim datfala day blo big trabolAnd letem raf fasin for stap midolwan lo iufala?
4 Olketa leidaon lo olketa ivory bed and leidaon antap olketa kusun chair,Olketa kaikaim olketa best man sheepsheep and olketa fat young buluka.*
5 Taem olketa herem saond blo harp,* olketa composim olketa song,And olsem David, olketa wakem olketa music instrument.
6 Olketa drinkim wine from olketa bowlAnd olketa anointim olketa seleva witim olketa best oil.
Bat olketa nating warim nomoa* nogud samting wea kasem Joseph.
7 So olketa bae go prisoner, olketa nao bae first wan for go prisoner,And olketa wild party and wei blo olketa for relax bae finis.
8 ‘Sovereign Lord Jehovah hem promis olsem lo laef* blo hemseleva,’ diswan nao wanem Jehovah, God wea hem komanda blo olketa army, hem talem,‘“Mi heitim praod fasin blo Jacob,Mi heitim olketa strongfala taoa blo hem,And mi bae givim datfala taon and evri samting insaed go lo olketa enemy.
9 “‘“And sapos tenfala man stap yet lo wanfala haos, olketa tu bae dae.
10 Wanfala relative* bae kam for karem olketa aotsaed and bonem olketa wan bae wan. Hem bae tekem olketa bon blo olketa aot from datfala haos. Then hem bae sei lo eniwan wea stap lo olketa rum insaed datfala haos, ‘Hao, eniwan moa stap witim iu?’ And man hia bae sei, ‘No eniwan nao!’ Then hem bae sei, ‘Iu kwaet! Bikos hem no taem yet for story abaotem nem blo Jehovah.’”
11 Bikos Jehovah nao givim datfala komand,Hem bae smasem datfala big haos gogo hem pisis,And datfala smol haos gogo hem pisis.
12 Hao, olketa horse savve ran antap wanfala big ston,Or wanfala horse savve pullim hou witim olketa buluka?
Bikos iu mekem justice kamap wanfala poison plant,And frut blo raeteous fasin kamap wormwood* plant.
13 Iufala hapi lo iusles samting,And iufala sei, “Hao, ino paoa blo mifala seleva nao mekem mifala strong?”*
14 Dastawe, O pipol lo Israel, mi bae mekem wanfala nation againstim iufala,’ diswan nao wanem Jehovah, God wea hem komanda blo olketa army, hem talem,‘And olketa bae mekem iufala safa start lo Lebo-Hamath* go kasem datfala Wadi* lo Arabah.’”
Olketa footnote
^ Or, “no kea.”
^ Luk olsem diswan hem storyim kingdom blo Judah and kingdom blo Israel.
^ Or, “young bull.”
^ Or, “string instrument.”
^ Heb., “sik lo.”
^ Or, “soul.”
^ Heb., “Brata blo dadi blo hem.”
^ Or, “saoa.” Lukim “Wormwood” lo Dictionary.
^ Heb., “mifala tekem olketa horn for mifala seleva.”
^ Or, “border blo Hamath.”
^ Lukim “Wadi” lo Dictionary.