Deuteronomy 34:1-12
34 Then Moses lusim wilderness lo Moab and go ap lo Maunt Nebo, lo antap lo Pisgah wea feis go lo Jericho. And Jehovah showim hem datfala full land, start from Gilead go kasem Dan,
2 and full land blo Naphtali and land blo Ephraim and Manasseh, and full land blo Judah go kasem datfala western sea,*
3 and datfala Negeb and distrik blo Jordan, datfala flat ples lo Jericho, wea hem taon blo staka palm tree, go kasem Zoar.
4 Then Jehovah sei lo hem: “Diswan nao land wea mi promis olsem lo Abraham, Isaac, and Jacob, ‘Mi bae givim disfala land lo olketa pikinini* blo iu.’ Mi letem iu for lukim disfala land lo eye blo iu bat iu bae no akros go lo there.”
5 Bihaen datwan, Moses, servant blo Jehovah, hem dae lo datfala land lo Moab olsem Jehovah hem talem.
6 Hem berem Moses lo valley lo land lo Moab, opposite lo Beth-peor, and no eniwan savve wea nao grev blo hem stap kam kasem tuday.
7 Moses hem 120 years old taem hem dae. Lo datfala taem Moses savve lukluk gud yet and hem still strong.
8 Olketa Israelite krae for Moses lo wilderness lo Moab for 30 days. Then olketa day for krae and sorre for Moses hem finis.
9 Joshua, son blo Nun, hem garem bigfala wisdom* bikos Moses putim hand blo hem antap hed blo hem, and olketa Israelite start for lisin lo hem, and olketa duim evri samting wea Jehovah komandim lo Moses.
10 Bat no eni nara profet moa kamap lo Israel wea olsem Moses, wea Jehovah barava savve gud lo hem.*
11 Hem duim evri saen and mirakol wea Jehovah sendem hem for duim lo land lo Egypt, lo Pharaoh and lo evri servant blo hem and lo evri ples lo land blo hem,
12 and tu, Moses showim strongfala hand and bigfala paoa front lo eye blo evri Israelite.
Olketa footnote
^ Diswan hem Great Sea. Mediterranean Sea.
^ Heb., “seed.”
^ Or, “wisdom wea kam from holy spirit blo God.”
^ Heb., “feis tu feis.”
