Exodus 37:1-29
37 Then Bezalel iusim acacia wood for mekem datfala Ark blo Covenant.* Long blo hem tu and haf cubit,* wan and haf cubit waed, and wan and haf cubit hae.
2 Hem coatim insaed and aotsaed blo box hia witim pure gold. And hem iusim gold for mekem design* raonem antap blo box hia.
3 Bihaen datwan, hem wakem fofala ring from gold for pasim antap fofala leg blo box hia. Tufala ring lo wansaed and nara tufala ring lo narasaed.
4 Then hem iusim acacia wood for mekem olketa longfala stik and coatim witim gold.
5 Then hem pushim olketa longfala stik hia thru lo olketa ring hia wea stap lo saed blo datfala Ark blo Covenant for karem Ark blo Covenant hia.
6 Hem mekem lid from pure gold for datfala box. Long blo hem tu and haf cubit, and wan and haf cubit waed.
7 Then hem iusim hammer for wakem tufala cherub from gold lo tufala end blo datfala lid.
8 Wanfala cherub lo wan end, and nara cherub lo nara end. Hem karvem tufala cherub hia lo tufala end blo datfala lid.
9 Tufala cherub hia feisim each other and wing blo tufala spred aot and kavarem datfala lid lo wing blo tufala. Feis blo tufala cherub hia feisim datfala lid.
10 Then hem mekem wanfala tebol from acacia wood. Long blo hem tu cubit, wan cubit waed, and wan and haf cubit hae.
11 And hem coatim tebol hia witim pure gold, and hem iusim gold for mekem design* raonem edge blo hem.
12 Then hem mekem batten go raonem saed blo tebol hia. Waed blo batten hia hem waed blo fofala finger.* Then hem iusim gold for mekem nara design* lo edge blo botom blo batten hia.
13 Then hem wakem fofala ring from gold for datfala tebol and pasim antap fofala leg blo tebol hia. Tufala ring lo wansaed and nara tufala ring lo narasaed.
14 Fofala ring hia stap klosap lo batten, for holem olketa longfala stik wea olketa iusim for karem datfala tebol.
15 Then hem iusim acacia wood for mekem tufala long stik and coatim witim gold for karem datfala tebol.
16 Bihaen datwan, hem iusim pure gold for mekem olketa utensil blo datfala tebol. Olketa utensil hia nao olketa dish, olketa kap, olketa bowl, and olketa jug wea olketa bae iusim for pourim olketa drink offering.*
17 Then hem mekem datfala lampstand from pure gold. Hem iusim hammer for wakem datfala lampstand. Hem iusim wanfala pis gold for mekem base blo lampstand, stem blo hem, olketa base blo flaoa, olketa flaoa bud blo hem, and olketa petal blo hem.
18 Sixfala branch kamaot from stem blo datfala lampstand, thrifala branch lo wansaed and thrifala branch lo narasaed.
19 Each branch lo wansaed garem base blo flaoa wea sheip olsem almond flaoa, and flaoa bud, and petal blo flaoa, and then nara tufala set olsem moa lo datfala sem branch. Then semsem tu witim each branch lo narasaed. Sixfala branch blo lampstand hia luk semsem.
20 Antap lo stem blo datfala lampstand hem garem base blo flaoa wea sheip olsem almond flaoa, flaoa bud and petal blo flaoa, and then nara thrifala set olsem moa laen ap followim stem hia.
21 Wanfala flaoa bud stap andanit first tufala branch wea kamaot from datfala stem, and nara flaoa bud stap andanit nara tufala branch, and nara flaoa bud moa andanit lo nara tufala branch. Sixfala branch hia kamaot from datfala stem.
22 Hem iusim hammer for wakem olketa flaoa bud and olketa branch and full lampstand hia lo wanfala pis gold nomoa.
23 Then hem iusim pure gold for mekem sevenfala lamp for lampstand hia, witim olketa tongs and olketa fire holder* blo hem.
24 Hem wakem lampstand hia and evri utensil blo hem from wanfala talent* blo pure gold.
25 Then hem iusim acacia wood for mekem altar for bonem incense. Altar hia hem square, and hem wan cubit long, wan cubit waed, and tu cubit hae. Taem hem mekem altar hia hem karvem olketa horn lo hem.
26 Hem coatim lo antap blo altar hia, raonem evri saed blo hem, and olketa horn blo hem witim pure gold. And hem iusim gold for mekem design* raonem edge lo top part blo hem.
27 Hem mekem tufala gold ring lo wansaed and nara tufala gold ring lo narasaed andanit design* raonem edge blo datfala altar. Olketa ring hia bae holem olketa longfala stik wea olketa iusim for karem datfala altar.
28 Bihaen datwan, hem iusim acacia wood for mekem olketa longfala stik and coatim witim gold.
29 Then hem mekem holy oil for anointing wea hem mixim gud, and hem mekem tu pure incense wea smel naes wea hem mixim gud.*
Olketa footnote
^ Lukim “Ark blo Covenant” lo Dictionary.
^ Wan cubit equals 44.5 cm (17.5 in.). Lukim App. B14.
^ Or, “molding.”
^ Or, “molding.”
^ Samting olsem 7.4 cm (2.9 in.). Lukim App. B14.
^ Or, “molding.”
^ Lukim “Drink Offering” lo Dictionary.
^ Lukim “Fire Holder” lo Dictionary.
^ Wanfala talent equals 34.2 kg. Lukim App. B14.
^ Or, “molding.”
^ Or, “molding.”
^ Or, “olsem hao samwan wea savve tumas hao for mekem perfume oil hem duim.”
