Ezekiel 31:1-18
-
Egypt, datfala tol cedar tree hem foldaon (1-18)
31 Lo mek-11 year, lo mek-thri month, lo first day blo datfala month, mi kasem moa toktok from Jehovah, wea sei:
2 “Son blo man, tok olsem lo Pharaoh, king blo Egypt and olketa crowd wea sapotim hem,‘Hu nao garem bigfala paoa olsem iu?
3 Wanfala man blo Assyria hem stap, wanfala cedar tree lo Lebanon,Wea garem olketa naes branch olsem wanfala thik bush wea givim shade, hem tol fogud,Top blo hem go kasem olketa cloud.
4 Olketa wata mekem hem grow big, olketa springwata wea deep nao mekem hem tol fogud.
Olketa stream stap raonem ples wea olketa plantim lo hem,And olketa ran followim drain wea olketa digim for watarem evri tree lo open ples.
5 Dastawe hem grow tol winim evri nara tree lo open ples.
Bikos lo staka wata from olketa stream blo hemHem garem staka big branch, and olketa branch blo hem long fogud.
6 Evri bird lo skae wakem nest blo olketa lo olketa big branch blo hem,Evri wild animal lo open ples bornem baby blo olketa andanit olketa branch blo hem,And staka pipol from olketa nation stap andanit lo shade blo hem.
7 Tree ia barava big, hem luk naes fogud and hem garem olketa long branch,Bikos olketa rut blo hem go daon kasem ples wea garem staka wata.
8 No eni nara cedar tree lo garden blo God olsem hem.
No eni juniper tree hem garem olketa big branch olsem hem,And no eni plane tree hem garem olketa branch olsem hem.
No eni nara tree lo garden blo God luk naes winim hem.
9 Mi mekem hem for garem staka leaf, wea datwan mekem hem luk naes,And evri nara tree lo Eden, garden blo datfala tru God jealous lo hem.’
10 “So diswan nao wanem Sovereign Lord Jehovah hem talem: ‘Bikos hem* grow tol fogud, hem liftimap top blo hem go kasem olketa cloud, and heart blo hem kamap praod bikos hem hae fogud,
11 bae mi givim hem go lo strongfala ruler blo olketa nation. Ruler ia bae duim samting againstim hem, and bae mi rejectim hem bikos lo olketa nogud samting wea hem duim.
12 And olketa foreigner, olketa nation wea raf fogud, olketa bae katem hem daon, and olketa bae leavim hem antap lo olketa maunten, and olketa leaf blo hem bae foldaon lo evri valley, and olketa branch blo hem wea brek bae foldaon lo evri stream lo datfala land. Evri pipol lo earth bae lusim hem and go aot from shade blo hem.
13 Evri bird lo skae bae stap lo stem blo hem wea foldaon finis, and evri wild animal lo open ples bae stap lo olketa branch blo hem.
14 Diswan hem for mekem no eni tree wea grow klosap lo wata for grow tol fogud, or liftimap top blo hem go kasem olketa cloud, and no eni tree wea kasem staka wata for grow hae olsem olketa. Bikos evriwan lo olketa bae dae, olketa bae go andanit lo graon, witim olketa son blo olketa man wea go daon insaed lo hol.’*
15 “Diswan nao wanem Sovereign Lord Jehovah hem talem: ‘Lo day wea hem go daon lo Grev,* mi bae mekem pipol sorre fogud. So mi bae kavarem olketa deep wata and blokem olketa stream blo hem mekem staka wata wea hem garem no ran. Bikos lo hem, mi bae mekem Lebanon for kamap dark, and olketa tree lo open ples bae kamap drae.
16 Bae mi mekem olketa nation seksek, taem olketa herem noes blo hem taem hem foldaon, lo taem mi mekem hem go daon lo Grev* witim olketa wea go daon insaed hol,* and evri tree lo Eden, olketa gud and olketa best tree lo Lebanon, evriwan wea kasem staka wata, bae feel gud andanit lo graon.
17 Olketa go daon lo Grev* finis witim hem, lo olketa wea dae lo sword, witim olketa wea sapotim* hem wea stap andanit lo shadow blo hem midolwan lo olketa nation.’
18 “‘No eni tree lo Eden hem olsem iu wea pipol mekhae lo hem and wea hem barava strong. Nomata olsem, iu bae go daon andanit lo graon witim olketa tree lo Eden. Iu bae leidaon midolwan lo olketa wea no circumcise, witim olketa wea dae lo sword. Diswan nao samting wea bae happen lo Pharaoh and olketa crowd wea sapotim hem,’ hem nao wanem Sovereign Lord Jehovah talem.”
Olketa footnote
^ Heb., “iu.”
^ Or, “grev.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “grev.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Heb., “arm blo.”
