Ezekiel 35:1-15
-
Profesi againstim olketa maunten lo Seir (1-15)
35 Mi kasem moa toktok from Jehovah, wea sei:
2 “Son blo man, tanem go feis blo iu lo olketa area lo olketa maunten lo Seir, and talem profesi againstim hem.
3 Tok olsem lo hem, ‘Diswan nao wanem Sovereign Lord Jehovah hem talem: “O olketa area lo olketa maunten lo Seir, mi bae againstim iu, and mi bae stretem go hand blo mi againstim iu, and mekem iu kamap land wea stap nating.
4 Bae mi mekem olketa taon blo iu for distroe, and bae iu kamap land wea stap nating. And bae iu mas savve dat mi nao Jehovah.
5 Bikos iu bin evritaem mek trabol, and iu givim olketa Israelite go lo sword lo taem wea olketa kasem hard taem, lo taem wea olketa kasem last panis blo olketa.”’
6 “‘So mi promis lo laef blo miseleva,’ hem nao wanem Sovereign Lord Jehovah talem, ‘Mi bae redyim iu for kapsaetem blood blo iu, and dae* bae aftarem iu. Bikos blood nao iu heitim, so dae bae aftarem iu.
7 Mi bae mekem olketa area lo olketa maunten lo Seir kamap land wea stap nating, and bae mi aotem from hem eniwan wea go insaed and eniwan wea kamaot lo hem.
8 Bae mi fulimap olketa maunten hia witim pipol wea olketa killim dae. And olketa wea dae lo sword bae foldaon lo olketa hill blo iu, lo olketa valley blo iu, and lo evri stream blo iu.
9 Mi bae mekem iu wanfala ples wea stap emti for olowe, and olketa taon blo iu bae no eniwan stap lo hem. And bae iufala mas savve dat mi nao Jehovah.’
10 “Bikos iu tok olsem, ‘Tufala nation ia and tufala land ia bae hem blo mi, and mifala bae tekem tufala evriwan for mifala onam,’ nomata Jehovah stap lo there,
11 ‘so mi promis lo laef blo miseleva,’ hem nao wanem Sovereign Lord Jehovah talem, ‘Mi bae treatim iu semsem olsem hao iu kros lo olketa and iu jealous lo olketa from iu heitim olketa. And midolwan lo olketa mi bae mekem olketa for savve lo mi taem mi judgem iu.
12 Then bae iu mas savve dat mi nao Jehovah, mi bin herem evri nogud samting wea iu talem againstim olketa maunten lo Israel, taem iu sei, “Olketa stap nating nao and olketa givim lo iumi finis for distroem.”*
13 And iufala bin tok praod againstim mi, and iufala bin talem staka toktok againstim mi. Mi herem evriting iufala talem.’
14 “Diswan nao wanem Sovereign Lord Jehovah hem talem: ‘Evriwan lo earth bae hapi taem mi bae mekem iu kamap land wea stap nating.
15 From iu hapi taem land blo pipol blo Israel hem distroe, sem samting tu bae mi duim lo iu. Bae iu kamap ples wea distroe, O olketa area lo olketa maunten lo Seir, yes, evriwea lo Edom. And bae olketa mas savve dat mi nao Jehovah.’”
