Genesis 11:1-32
11 Lo datfala taem, evriwan lo earth gohed for story lo wan languis and iusim olketa sem word.*
2 Taem pipol travel go lo east, olketa kasem wanfala flat ples lo land lo Shinar, so olketa setol lo there.
3 Then olketa sei lo each other: “Kam, iumi mekem olketa brik and beikem lo fire.” So olketa no iusim ston bat olketa iusim brik, and olketa no iusim cement for joinim olketa brik hia bat olketa iusim tar.
4 Then olketa sei: “Kam, iumi buildim wanfala taon and wanfala taoa wea hae go kasem skae mekem evriwan mekhae lo nem blo iumi, and mekem iumi no go stap evriwea lo disfala earth.”
5 Then Jehovah go daon for lukim datfala taon and datfala taoa wea olketa man hia buildim.
6 So Jehovah sei: “Lukim! Pipol hia wan mind and olketa story lo wan languis, and diswan nao samting wea olketa start for duim. Distaem eniting wea olketa tingim bae hem no hard nomoa for olketa duim.
7 Kam! Iumi go daon for mekem olketa hia story lo difren languis for olketa konfius and no minim languis blo each other.”
8 So Jehovah mekem olketa go stap evriwea lo earth, and gogo, olketa stop nao for buildim datfala taon.
9 Dastawe nem blo datfala ples hem Babel* bikos lo there nao Jehovah mekem evri pipol lo earth* for story lo difren languis mekem olketa konfius. And Jehovah mekem olketa for go stap evriwea lo earth.
10 Story abaotem laen blo Shem hem olsem.
Tufala year bihaen lo datfala Flood, taem Shem hem 100 years old, hem kamap dadi blo Arpachshad.
11 Bihaen Arpachshad born, Shem stap for nara 500 years, and hem garem olketa nara son and dota.
12 Arpachshad stap for 35 years and then hem kamap dadi blo Shelah.
13 Bihaen Shelah born, Arpachshad stap for nara 403 years, and hem garem olketa nara son and dota.
14 Shelah stap for 30 years and then hem kamap dadi blo Eber.
15 Bihaen Eber born, Shelah stap for nara 403 years, and hem garem olketa nara son and dota.
16 Eber stap for 34 years and then hem kamap dadi blo Peleg.
17 Bihaen Peleg born, Eber stap for nara 430 years, and hem garem olketa nara son and dota.
18 Peleg stap for 30 years and then hem kamap dadi blo Reu.
19 Bihaen Reu born, Peleg stap for nara 209 years, and hem garem olketa nara son and dota.
20 Reu stap for 32 years and then hem kamap dadi blo Serug.
21 Bihaen Serug born, Reu stap for nara 207 years, and hem garem olketa nara son and dota.
22 Serug stap for 30 years and then hem kamap dadi blo Nahor.
23 Bihaen Nahor born, Serug stap for nara 200 years, and hem garem olketa nara son and dota.
24 Nahor stap for 29 years and then hem kamap dadi blo Terah.
25 Bihaen Terah born, Nahor stap for nara 119 years, and hem garem olketa nara son and dota.
26 Bihaen Terah stap for 70 years, hem kamap dadi blo Abram, Nahor, and Haran.
27 Story abaotem laen blo Terah hem olsem.
Terah kamap dadi blo Abram, Nahor, and Haran. And Haran kamap dadi blo Lot.
28 Haran hem dae lo land wea hem born, lo Ur, ples blo olketa Chaldean, taem dadi blo hem Terah laef yet.
29 Abram marit, and Nahor tu marit. Nem blo waef blo Abram hem Sarai, and nem blo waef blo Nahor hem Milcah. Tufala dota blo Haran nao Milcah and Iscah.
30 Sarai no savve garem pikinini, so hem no bornem eni pikinini.
31 Then Terah tekem son blo hem Abram and granson blo hem Lot, son blo Haran, and Sarai, dota-in-law blo hem, wea hem waef blo son blo hem Abram, and olketa lusim Ur, ples blo olketa Chaldean for go lo land lo Canaan. Gogo, olketa kasem Haran and olketa setol lo there.
32 Terah hem laef for 205 years. Then Terah dae lo Haran.
