Genesis 23:1-20
-
Sarah dae and ples wea olketa berem hem (1-20)
23 And Sarah laef for 127 years. Hem nao olketa year wea Sarah hem laef.
2 So Sarah dae lo Kiriath-arba, wea nara nem blo hem Hebron, lo land lo Canaan. And Abraham barava sorre and krae tumas for Sarah.
3 Then hem lusim ples wea waef blo hem wea dae hem leidaon, and go story witim olketa lo laen blo Heth. Hem sei:
4 “Mi wanfala foreigner wea setol witim iufala. Mi laekem wanfala pis land from iufala for mi berem waef blo mi.”
5 So olketa lo laen blo Heth sei lo Abraham:
6 “Lord blo mi, lisin lo mifala. Mifala luksavve iu man wea God chusim.* Iu savve berem waef blo iu lo best ples lo olketa burial ples blo mifala. No eniwan lo mifala bae stopem burial ples blo hem from iu for iu berem waef blo iu.”
7 So Abraham getap and baodaon lo olketa lo laen blo Heth,
8 and hem sei lo olketa: “Sapos iufala* agree for letem mi berem waef blo mi, plis lisin lo mi and askem Ephron, son blo Zohar,
9 for salem lo mi datfala cave lo Machpelah, wea hem onam. Datfala cave hem stap klosap lo end lo land blo hem. Mi laekem for hem salem lo mi front lo iufala for full price blo silver mekem mi garem pis land for kamap burial ples.”
10 Ephron, datfala Hittite hem sidaon witim olketa lo laen blo Heth. And Ephron tok olsem lo Abraham front lo olketa lo laen blo Heth, and front lo olketa wea kam insaed gate lo datfala taon. Ephron sei:
11 “Nomoa, lord blo mi! Herem mi kam. Mi givim datfala pis land and cave wea stap insaed for iu. Mi givim for iu front lo pipol blo mi. Iu savve berem waef blo iu lo there.”
12 Then Abraham baodaon front lo pipol lo datfala land
13 and hem tok olsem lo Ephron front lo olketa pipol hia. Hem sei: “Plis herem mi kam! Bae mi givim full price lo silver for datfala pis land. Tekem diswan from mi mekem mi savve berem waef blo mi lo there.”
14 Then Ephron sei lo Abraham:
15 “Lord blo mi, lisin lo mi. Price blo disfala land hem 400 silver shekel,* bat datfala price no important lo iumi tufala. Iu go berem waef blo iu.”
16 Abraham agree lo wanem Ephron talem, and hem scalem amount wea Ephron talem front lo olketa lo laen blo Heth. Hem givim 400 silver shekel* lo Ephron followim weight wea olketa bisnisman acceptim.
17 And Ephron salem pis land blo hem lo Machpelah, wea stap klosap lo Mamre. Datfala pis land, datfala cave, and evri tree insaed datfala pis land,
18 Abraham hem baem front lo olketa lo laen blo Heth, and front lo eye blo olketa wea kam insaed gate lo taon.
19 Bihaen datwan, Abraham berem waef blo hem Sarah insaed datfala cave lo land lo Machpelah, wea stap klosap lo Mamre, wea nara nem blo hem, Hebron, lo land lo Canaan.
20 So olketa lo laen blo Heth givim datfala pis land and cave lo there for Abraham onam and datwan kamap burial ples.
Olketa footnote
^ Or maet, “wanfala nambawan leader.”
^ Or, “olketa soul blo iufala.”
^ Wanfala shekel equals 11.4 g. Lukim App. B14.
^ Wanfala shekel equals 11.4 g. Lukim App. B14.
