Genesis 7:1-24
7 Bihaen datwan, Jehovah sei lo Noah: “Iu go insaed lo ark, iu and evriwan lo famili blo iu bikos mi lukim iu nao barava raeteous man lo disfala genereson.
2 Iu mas tekem sevenfala* lo olketa difren kaen klin* animal, man wan and mere wan blo hem. And olketa animal wea no klin iu tekem nomoa tufala, man wan and mere wan blo hem.
3 And tu, iu mas tekem sevenfala* lo olketa animal wea flae lo skae, man wan and mere wan. Mekem olketa bornem olketa pikinini for gohed stap lo full earth.
4 Bikos sevenfala day nomoa left then bae mi mekem hem rain lo earth for 40 days and 40 naet. And bae mi finisim from disfala graon evri samting wea laef wea mi wakem.”
5 Then Noah duim evriting wea Jehovah talem lo hem.
6 Noah hem 600 years old taem flood hem kavarem earth.
7 So Noah, olketa son blo hem, waef blo hem, and olketa waef blo olketa son blo hem go insaed lo ark bifor flood hem kam.
8 Lo olketa klin animal, olketa animal wea no klin, olketa animal wea flae, and evri animal wea muv antap lo graon,
9 olketa hia go lo Noah insaed lo ark, tu bae tu, man wan and mere wan, olsem God talem lo Noah.
10 Then sevenfala day bihaen, hem start for rain and flood hem kasem earth.
11 Lo mek-600 year wea Noah hem laef, lo mek-17 day blo mek-tu month, lo datfala day bigfala wata lo skae hem bosta and evri gate blo wata lo skae hem open.
12 And hem gohed rain lo earth for 40 days and 40 naet.
13 Lo datfala sem day, Noah go insaed lo ark witim olketa son blo hem, Shem, Ham, and Japheth, and waef blo hem and thrifala waef blo olketa son blo hem.
14 Olketa go insaed lo ark witim evri difren kaen wild animal, evri difren kaen animal wea tame, evri difren kaen animal wea krol lo graon, evri difren kaen animal wea flae, evri bird, and evri animal wea garem wing.
15 Evri difren kaen animal wea garem brith blo laef* go lo Noah insaed lo ark, tu bae tu.
16 So olketa man wan and mere wan lo evri difren kaen animal* go insaed, olsem God talem lo Noah. Bihaen datwan, Jehovah satem door.
17 Flood hem gohed for 40 days lo earth, and wata gohed for kamap hae go kasem taem ark hem start for float antap wata wea kavarem earth.
18 Wata hia gohed for kamap big and hae winim graon, bat ark hia float antap lo wata.
19 Wata hia hem hae gogo nomata olketa hae maunten lo full earth bat hem kavarem tu.
20 Wata hia hem 15 cubit* hae winim antap blo olketa maunten.
21 So evri samting* wea laef and muv antap lo earth olsem olketa animal wea flae, olketa animal wea tame, olketa wild animal, olketa nara animal wea smol,* and evri man, evriwan hia dae.
22 Evri samting lo drae land wea garem brith blo laef* insaed nose blo olketa, evriwan dae.
23 So God finisim evri samting wea laef antap lo earth, olsem olketa man, olketa animal, olketa animal wea krol lo graon, and olketa animal wea flae lo skae. Hem finisim evri samting hia from disfala earth. Noah and olketa wea stap witim hem lo ark nomoa olketa laef.
24 And wata hia kavarem full earth for 150 days.
Olketa footnote
^ Or maet, “sevenfala man wan and sevenfala mere wan blo olketa klin animal.”
^ Maet diswan hem olketa animal wea olketa fit for sakrifaesim lo God.
^ Or maet, “sevenfala man wan and sevenfala mere wan blo olketa animal wea flae lo skae.”
^ Or, “spirit blo laef.”
^ Heb., “flesh.”
^ Wan cubit equals 44.5 cm (17.5 in.). Lukim App. B14.
^ Heb., “flesh.”
^ Diswan hem olketa smol animal wea stap tugeta lo grup.
^ Or, “brith blo spirit blo laef.”
