Genesis 8:1-22
8 Bat God tingim Noah and evri wild animal and olketa animal wea tame, wea stap witim Noah insaed ark. So God mekem wind for blow ovarem earth, and wata hia start for go daon.
2 Bigfala wata lo skae and evri gate blo wata lo skae hem sat, so datfala rain hem stop nao.
3 Then wata lo earth start for gogo daon. Lo end blo mek-150 day, wata hia go daon nao.
4 Lo mek-17 day blo mek-seven month, ark hem sidaon antap lo olketa maunten blo Ararat.
5 And wata hia gohed for go daon kasem mek-ten month. Lo first day blo mek-ten month, top blo olketa maunten hem showaot.
6 So lo end blo mek-40 day, Noah openem window blo ark hia
7 and sendem go wanfala raven bird. Bird hia gohed for flae go aotsaed and kam bak lo ark, go kasem taem wata hia drae from earth.
8 Bihaen, hem sendem go wanfala kurukuru for faendaot sapos wata hia go daon finis from disfala earth or nomoa yet.
9 Datfala kurukuru no faendem eni ples for hem sidaon,* so hem go bak lo Noah insaed ark bikos wata hia still kavarem graon. So Noah givim go hand blo hem and tekem kam kurukuru hia insaed ark.
10 Noah weit sevenfala day moa, then hem sendem go moa datfala kurukuru from ark.
11 Taem hem gogo for evening, kurukuru hia kam bak lo Noah and hem lukim hem baetem kam fresh leaf blo olive tree lo mouth blo hem! So Noah savve wata hia go daon finis.
12 Noah weit for nara sevenfala day moa, then hem sendem aot datfala kurukuru bat hem no kam bak nao.
13 Lo first day blo first month blo mek-601 year, wata antap lo graon start for drae nao. So Noah aotem part lo ruf blo ark and hem lukim antap lo graon start for drae nao.
14 Lo mek-27 day blo mek-tu month, earth hem barava drae nao.
15 So God sei lo Noah:
16 “Go aot from ark, iu, waef blo iu, olketa son blo iu, and olketa waef blo olketa son blo iu.
17 Leadim go aot evri difren kaen animal* wea stap witim iu lo ark. Olketa animal wea savve flae, olketa animal wea tame, olketa wild animal, and olketa animal wea savve krol lo graon mekem olketa bornem pikinini, kamap staka, and fulimap disfala earth.”
18 So, Noah go aot from ark witim olketa son blo hem, waef blo hem, olketa waef blo olketa son blo hem,
19 evri samting wea laef, evri animal wea krol, evri animal wea flae, and evri animal wea muv lo graon. Evri animal hia go aot from datfala ark followim olketa grup blo each animal.
20 Then Noah buildim wanfala altar for Jehovah and tekem samfala animal from evri klin* animal and from evri klin animal wea savve flae, and hem sakrifaesim olketa burnt offering* lo datfala altar.
21 And Jehovah start for smelem datwan and hem smel naes tumas.* So Jehovah sei lo heart blo hem: “First and last for mi mekem graon for nogud bikos lo nogud samting wea stap lo heart blo man start from taem hem young. And no enitaem moa bae mi finisim evri samting wea laef olsem mi duim.
22 Start distaem earth bae no stop for garem season for plant and season for harvest, cold and hot, summer season* and winter season,* and day and naet.”
Olketa footnote
^ Or, “for putim leg blo hem.”
^ Heb., “flesh.”
^ Maet diswan hem olketa animal wea olketa fit for sakrifaesim lo God.
^ Lukim “Burnt Offering” lo Dictionary.
^ Heb., “mekem mind blo hem gud.”
^ Lukim App. B15.
^ Lukim App. B15.
