Haggai 1:1-15
1 Lo mek-tu year lo rul blo King Darius, lo mek-six month, lo first day blo datfala month, profet Haggai* kasem toktok from Jehovah for go talem lo Zerubbabel, son blo Shealtiel wea hem governor blo Judah, and lo Joshua wea hem hae priest, son blo Jehozadak, wea sei:
2 “Diswan nao wanem Jehovah, komanda blo olketa army hem talem, ‘Pipol ia sei, “Hem no taem yet for buildim* haos* blo Jehovah.”’”
3 And profet Haggai kasem moa toktok from Jehovah, wea sei:
4 “Waswe, hem taem for iufala stap lo olketa naes haos blo iufala, taem disfala haos hem distroe and stap olsem nomoa?
5 So diswan nao wanem Jehovah, komanda blo olketa army hem talem, ‘Putim heart blo iufala lo* olketa wei blo iufala.
6 Iufala plantim staka seed, bat iufala harvestim lelebet nomoa. Iufala kaikai, bat iufala nating satisfae. Iufala drink, bat iufala no garem inaf wine. Iufala werem kaleko, bat hem no keepim iufala warm. Man wea waka for selen putim wages blo hem lo basket wea garem staka hol.’”
7 “Diswan nao wanem Jehovah, komanda blo olketa army hem talem, ‘Putim heart blo iufala lo* olketa wei blo iufala.’
8 “Jehovah hem sei, ‘Go ap lo maunten and tekem kam olketa timba. And buildim datfala haos, mekem mi savve hapi lo hem and bae mi kasem glory from datwan.’”
9 “‘Iufala expectim staka samting, bat iufala kasem lelebet nomoa. And taem iufala tekem datwan kam lo haos, mi blowim go datwan. Why nao mi duim olsem?’ hem nao wanem Jehovah, komanda blo olketa army hem talem. ‘Bikos haos blo mi hem distroe and stap nomoa, taem each wan lo iufala busy for aftarem samting for own haos blo hem.
10 So skae antap lo iufala no givim kam dew, and earth no producem kaikai.
11 And mi mekem for hem drae lo earth, lo olketa maunten, lo grain, lo niu wine, lo oil, lo olketa samting wea grow lo graon, lo pipol and olketa animal, and lo evri samting wea hand blo iufala waka hard lo hem.’”
12 Zerubbabel, son blo Shealtiel and Joshua wea hem hae priest, son blo Jehozadak, and evri pipol, olketa evriwan lisin lo voice blo Jehovah, God blo olketa, and lo toktok wea profet Haggai hem talem, bikos Jehovah, God blo olketa nao sendem hem. And olketa pipol hia start for duim samting for showimaot olketa fraet lo Jehovah.
13 Then Haggai, datfala messenger blo Jehovah talem disfala message lo pipol, followim nao komand wea Jehovah talem hem, wea sei: “‘Mi stap witim iufala,’ hem nao wanem Jehovah talem.”
14 So Jehovah muvim heart* blo Zerubbabel, son blo Shealtiel wea hem governor blo Judah, and heart* blo Joshua wea hem hae priest, son blo Jehozadak, and heart* blo evri pipol. And olketa kam and start for wakem haos blo Jehovah, komanda blo olketa army, God blo olketa.
15 Diswan hem lo mek-24 day blo mek-six month, lo mek-tu year wea King Darius hem rul.
Olketa footnote
^ Mining blo hem “Born lo Taem blo Festival.”
^ Or, “buildim bak.”
^ Or, “temple.”
^ Or, “Ting raonem gud.”
^ Or, “Ting raonem gud.”
^ Heb., “spirit.”
^ Heb., “spirit.”
^ Heb., “spirit.”
