Hosea 11:1-12
11 “Taem Israel hem smol boy, mi lovem hem tumas,And mi kolem son blo mi for go aot from Egypt.
2 Taem olketa* gohed kolem olketa,Pipol hia just go farawe moa from olketa.
Olketa gohed for sakrifaes lo olketa idol blo BaalAnd olketa gohed offerim olketa sakrifaes lo olketa idol.
3 Bat mi nao teachim Ephraim for wakabaot, and karem olketa lo tufala hand blo mi.And olketa nating luksavve dat mi nao healim olketa.
4 Mi iusim love and kaenfala fasin olsem rope* for pullim olketa kam lo mi.And mi olsem man wea aotem yoke* from olketa jaw blo olketa,And lo kaenfala wei mi tekem kam kaikai lo each wan.
5 Olketa bae no go bak lo land lo Egypt, bat Assyria bae kamap king blo olketa,Bikos olketa les for kam bak lo mi.
6 Olketa enemy bae attakim olketa taon blo hem witim swordAnd distroem olketa bar lo gate blo hem and finisim olketa bikos lo nogud plan blo olketa.
7 Pipol blo mi barava no faithful lo mi.
Nomata olketa kolem olketa for go ap,* no eniwan standap.
8 O Ephraim, iu ting bae mi les lo iu?
O Israel, iu ting bae mi givim iu go?
Iu ting bae mi treatim iu olsem Admah?
Iu ting bae mi mekem iu olsem Zeboiim?
Mi change mind* finis.Lo semtaem feeling blo mi for sorre hem kamap big.*
9 Mi bae no aotem bigfala kros blo mi.
Mi bae no distroem Ephraim moa,Bikos mi God, and no man,Datfala Holy Wan wea stap witim iu.And mi bae no panisim iu bikos mi kros lo iu.
10 Olketa bae wakabaot followim Jehovah, and hem bae singaot big olsem lion.Taem hem singaot big, olketa son blo hem bae fraet and kam from west.
11 Olketa bae fraet olsem wanfala bird taem olketa kamaot from Egypt,Olsem wanfala kurukuru wea kamaot from land lo Assyria.And mi bae mekem olketa for stap lo olketa haos blo olketa,” diswan nao wanem Jehovah talem.
12 “Taem Ephraim story lo mi hem laea nomoa,And evri ples mi tane mi lukim laea blo pipol lo Israel.
Bat Judah still followim* God,And hem faithful lo datfala Most Holy Wan.”
Olketa footnote
^ Diswan hem olketa profet and olketa narawan wea God sendem olketa for teachim Israel.
^ Maet diswan hem rope wea parents iusim for teachim smol pikinini blo hem hao for wakabaot.
^ Lukim “Yoke” lo Dictionary.
^ Diswan hem tru worship.
^ Heb., “heart.”
^ Heb., “hot.”
^ Or, “wakabaot witim.”
