Isaiah 15:1-9
-
Strong message againstim Moab (1-9)
15 Wanfala strong message againstim Moab:
Bikos hem distroe insaed wanfala naet nomoa,Ar lo Moab hem stap kwaet nao.
Bikos hem distroe insaed wanfala naet nomoa,Kir lo Moab hem stap kwaet nao.
2 Pipol go ap finis lo datfala Haos* and lo Dibon,Lo olketa hae ples* for krae.
Moab krae big for Nebo and for Medeba.
Evriwan rezam hed blo olketa bolhed, and shavem beard blo olketa.
3 Lo olketa road blo hem, olketa werem kaleko for sorre.
Olketa evriwan krae antap olketa ruf blo olketa, and lo olketa pablik area blo olketa.
Olketa krae nomoa taem olketa go daon.
4 Heshbon and Elealeh tufala krae big.
Pipol wea stap kam lo Jahaz savve herem kam voice blo tufala.
Dastawe olketa soldia blo Moab gohed singaot.
Hem* seksek fogud.
5 Heart blo mi krae big for Moab.
Pipol blo hem wea ranawe, olketa go kasem Zoar and Eglath-shelishiyah.
Olketa gohed krae taem olketa followim road wea go ap lo Luhith.
Olketa krae big followim road wea go lo Horonaim bikos lo nogud samting hia wea kasem olketa.
6 Bikos olketa wata lo Nimrim hem drae.
Olketa green grass drae finis,Olketa grass no stap nao and no eni green samting stap.
7 Dastawe olketa tekem evri samting wea stap lo olketa stoahaos blo olketa and olketa riches blo olketa.
Olketa go akrosim valley* blo olketa poplar tree.
8 Bikos echo from krae blo olketa go kasem evri ples lo Moab.
Olketa blo Eglaim savve herem go bigfala krae blo olketa.
Olketa blo Beer-elim savve herem go bigfala krae blo olketa.
9 Bikos olketa wata lo Dimon hem fulap lo blood,And staka samting yet mi laek for duim lo Dimon.
Wanfala lion bae attakim olketa blo Moab wea ranaweAnd olketa wea stap yet lo datfala land.
Olketa footnote
^ Or, “datfala Temple.”
^ Lukim “Hae Ples” lo Dictionary.
^ Or, “Soul blo hem.”
^ Or, “wadi.” Lukim “Wadi” lo Dictionary.
