Isaiah 26:1-21
26 Lo datfala day, pipol bae singim disfala song lo land blo Judah:
“Mifala garem wanfala strong taon.
Wei wea hem sevem mifala hem olsem olketa wall, and graon wea olketa hipimap raonem taon.
2 Iufala openem olketa gate mekem nation hia wea raeteous savve kam insaed,Wanfala nation wea gohed for duim stret samting.
3 Iu bae protectim olketa wea barava depend lo iu.
Peace wea iu givim lo olketa bae no savve finis,Bikos olketa putim trust blo olketa lo iu.
4 Trustim Jehovah for olowe,Bikos Jah* Jehovah hem Rock wea stap for olowe.
5 From hem daonem pipol wea stap hae antap, lo datfala taon wea hae.
Hem daonem taon hia,Hem daonem go daon lo graon,Hem daonem go kasem dust.
6 Leg nao bae stepim taon hia,Leg blo man wea narawan treatim nogud, olketa footstep blo poor man.”
7 Road blo man wea raeteous hem stret.
Bikos wei blo iu hem stret,Iu bae mekem gogo blo man wea raeteous hem isi.
8 O Jehovah, taem mifala followim road blo iu wea followim justice,Hope blo mifala hem lo iu.
Mifala laekem tumas nem blo iu and for rememberim iu.*
9 Lo naet mi laekem iu tumas lo full heart blo mi,Tru tumas, lo full heart blo mi, mi lukaotem iu.
Bikos taem iu givim judgment for olketa lo earth,Olketa pipol wea stap lo land hia lane abaotem samting wea raeteous.
10 Nomata sapos iu sorre lo man wea wicked,Hem bae no lane abaotem samting wea raeteous.
Nomata hem stap lo land wea raeteous fasin stap, hem bae gohed duim nogud samting,And hem bae no luksavve lo bigfala paoa blo Jehovah.
11 O Jehovah, iu liftimap hand blo iu, bat olketa nating lukim datwan.
Bae olketa lukim iu protectim pipol blo iu, and datwan bae mekem olketa shame.
Tru tumas, fire for olketa enemy blo iu bae bonem olketa.
12 O Jehovah, iu bae givim peace lo mifala,Bikos evri samting wea mifala bin duimIu nao mekem evriting hia kamap tru for mifala.
13 O Jehovah, God blo mifala, olketa nara ruler tu stap wea rul ovarem mifala,Bat nem blo iu nomoa mifala mekhae lo hem.
14 Olketa dae finis, bae olketa no savve laef.
Olketa no garem paoa, olketa bae no laef bak.
Bikos iu duim samting lo olketa and finisim olketaFor panisim olketa and distroem evri samting wea mekem pipol for tingim olketa lo hem.
15 O Jehovah, iu mekem nation hia for kamap big,Iu mekem nation hia for kamap big.
Iu mekhae lo iuseleva.
Iu muvim evri baondri lo land hia mekem hem big.
16 O Jehovah, taem olketa kasem hard taem olketa tane kam lo iu.
Taem iu disciplinem olketa, olketa prea kwaet kam lo iu lo full heart blo olketa.
17 Olsem wanfala babule woman wea redi for bornem babyWea feelim bigfala pain and singaot big,Hem nao hao iu mekem mifala feel, O Jehovah.
18 Mifala babule, mifala bin feelim pain for bornem baby,Bat hem olsem mifala bornem wind nomoa.
Mifala nating duim eni samting for sevem land hia,And no eniwan born for stap lo land hia.
19 “Olketa blo iu wea dae bae laef.
Olketa dead body blo mi* bae getap.
Wekap and singaot from iufala hapi,Iufala pipol wea stap lo dust!
Bikos dew wea kam from iu, hem olsem dew lo morning,*And graon bae givim kam olketa wea dae wea no garem paoa for olketa laef bak.
20 Pipol blo mi, iufala go insaed olketa rum blo iufala,And satem kam door.
Iufala haed insaed for lelebet taemGo kasem taem kros blo God hem finis.
21 Bikos, Jehovah hem kam from ples wea hem stapFor mekem pipol wea stap lo land hia, for givim ansa for rong wea olketa duim,And wei wea land hia guilty lo blood bae showaot kliaAnd bae hem no savve haedem moa olketa wea dae lo hem.”
Olketa footnote
^ “Jah” hem short form lo nem blo Jehovah.
^ Datwan hem for rememberim God and nem blo hem, mekem pipol savve.
^ Heb., “Wanfala dead body blo mi.”
^ Or maet, “dew wea stap lo olketa herb (olketa mallow, wea hem wanfala kaen herb).”
