Isaiah 31:1-9
31 Sorre tumas lo olketa wea go daon lo Egypt for kasem help,Olketa wea depend lo olketa horse,Olketa wea trustim olketa war chariot bikos olketa staka tumas,And lo olketa horse for faet* bikos olketa strong tumas.
Bat olketa no luk lo datfala Holy Wan blo Israel,And olketa no lukaotem Jehovah.
2 Bat hem tu wise and hem bae mekem trabol,And hem bae no tekem bak toktok blo hem.
Hem bae kamap againstim haos blo pipol wea duim nogud samtingAnd againstim olketa wea helpem pipol wea duim nogud samting.
3 Olketa Egyptian hia olketa man nomoa, and olketa no God.
Olketa horse blo olketa hem animal nomoa, and no spirit.
Taem Jehovah stretem go hand blo hem,Eniwan wea laek helpem narawan bae stambolAnd eniwan wea kasem help bae foldaon.
Olketa evriwan bae finis lo semtaem.
4 Diswan nao wanem Jehovah talem lo mi:
“Lo sem wei olsem lion, wanfala strong young lion wea singaot ovarem animal wea hem redi for kaikaim,Taem wanfala grup blo shepherd hipap for againstim hem,Voice blo olketa no mekem hem fraetOr hem no wari lo noes olketa mekem,So Jehovah, komanda blo olketa army, tu bae kam daon for faetOvarem Maunt Zion and ovarem hill blo hem.
5 Olsem olketa bird wea flae kwiktaem kam, Jehovah, komanda blo olketa army tu bae kwiktaem defendim Jerusalem.
Bae hem defendim and sevem hem.
Bae hem tekem hem aot and rescuem hem.”
6 “Pipol blo Israel, iufala kam bak lo Man wea iufala barava againstim hem.
7 Bikos lo datfala day, each wan bae rejectim olketa iusles god blo hem wea olketa wakem lo silver, and olketa iusles god blo hem wea olketa wakem lo gold, wea iufala wakem lo hand blo iufala and hem wanfala sin.
8 And datfala man blo Assyria bae dae lo sword, bat no lo sword blo man.
And wanfala sword wea hem no sword blo man, bae finisim hem.
Hem bae ranawe bikos lo datfala sword,And olketa young man blo hem bae waka olsem slave.
9 Cave blo hem bae finis bikos hem barava fraet,And olketa leader blo hem bae barava fraet bikos lo datfala saen post,” hem nao wanem Jehovah talem,Wea laet* blo hem lo Zion and wea bigfala hot oven blo hem lo Jerusalem.
