Isaiah 34:1-17
34 Iufala olketa nation, kam klosap mekem iufala herem,And iufala olketa pipol, lisin gud.
Hem gud for earth and evri samting wea stap lo hem for lisin,Land and evri samting wea stap lo hem.
2 Bikos kros blo Jehovah hem kam againstim evri nation,And hem kros lo evri army blo olketa.
Hem bae mekem olketa for finis for olowe.
Hem bae killim olketa dae.
3 Olketa dead body blo olketa, bae leidaon olobaot,And rabis smel blo olketa dead body hia bae go ap,Olketa maunten bae melt bikos lo* blood blo olketa.
4 Evri army lo heven bae rotten gogo olketa finis,And olketa bae rolim skae olsem wanfala scroll.
Evri army blo olketa bae gogo for drae,Olsem wanfala drae leaf wea foldaon from vine blo grapeAnd wanfala drae fig wea foldaon from fig tree.
5 “Bikos sword blo mi lo heven bae full lo blood.
Hem bae kam daon lo Edom for givim judgment,Lo pipol wea mi disaed finis for distroem olketa.
6 Jehovah garem wanfala sword, wea blood nao bae kavarem.
Wea gris nao bae kavarem,Witim blood blo olketa young man sheepsheep and olketa goat,Witim gris blo kidney blo olketa man sheepsheep.
Bikos Jehovah mekem wanfala sakrifaes lo Bozrah,And staka pipol nao dae lo land lo Edom.
7 Olketa wild bull bae go daon witim olketa,Olketa young bull witim olketa wea barava strong.
Land blo olketa bae full lo blood,And dust blo olketa bae fulap lo gris.”
8 Jehovah markem finis wanfala day for pei bak,Wanfala year for givim panis, for mekem kot case lo pipol wea againstim Zion.
9 Olketa stream blo Bozrah* bae change for kamap tar,And dust blo hem kamap sulfur,And land blo hem bae kamap olsem tar wea barava hot.
10 Lo naet taem or daytaem fire bae no savve dae.
Smoke blo hem bae gohed nomoa for go ap.
From wanfala genereson go kasem nara genereson hem bae stap emti nomoa,No enitaem moa eniwan bae go pas thru lo hem.
11 Olketa pelican and olketa porcupine* bae onam hem,And olketa owl wea garem long ear, and olketa raven bird bae stap lo hem.
God bae iusim string for measurem samting and plumb line* for measurem land hia for showimDat hem bae kamap emti and iusles nomoa.
12 No eniwan lo olketa bigman blo hem bae kamap king,And evri prince blo hem bae finis nomoa.
13 Olketa nila grass bae grow lo olketa strong taoa blo hem,And olketa nettle plant and olketa rabis grass wea garem nila bae grow lo olketa strongfala ples blo hem for haed.
Hem bae kamap hol for olketa animal hia jackal,*And ples for olketa ostrich bird stap lo hem.
14 Olketa animal lo desert bae kam stap witim olketa animal wea savve singaot,And wild goat* bae singaot go lo fren blo hem.
Tru tumas, nightjar bird bae hem kam and faendem ples for rest.
15 Arrow snek bae mekem nest blo hem and leim olketa egg lo datfala ples,And olketa egg bae hatch lo there and hem hipimap olketa kam lo shadow blo hem.
Tru tumas, olketa kite bird bae hipap lo there, each wan witim partner blo hem.
16 Iufala lukaotem insaed buk blo Jehovah and readim big:
No eniwan lo olketa bae hem lus.
Evriwan lo olketa bae garem wanfala partner,Hem bikos order hia hem kam from mouth blo Jehovah,And spirit blo hem nao hipimap olketa kam tugeta.
17 Hem nao datfala Man wea bin iusim ston or stik* for olketa,And hand blo hem nao markem ples for olketa.*
Olketa bae stap lo hem for olowe.
Olketa genereson wea kam bihaen, bae stap lo hem for olowe.
Olketa footnote
^ Or, “bae flow lo.”
^ Luk olsem diswan hem kapitol taon blo Edom.
^ Hem wanfala type big rat wea garem olketa nila lo body blo hem for protectim hem. Lo English, nem blo hem porcupine.
^ Heb., “olketa ston.”
^ Hem wanfala wild animal wea luk olsem dog.
^ Or maet, “demon wea luk olsem goat.”
^ Lo English hem sei “lots.” Lukim “Lots” lo Dictionary.
^ Heb., “divaedem ples hia for olketa witim wanfala string for measurem samting.”
