Isaiah 47:1-15
47 Virgin dota blo Babylon,Iu kam daon and sidaon lo dust.
Dota blo olketa Chaldea,Iu sidaon lo graon wea no eni throne stap,Bikos no enitaem moa pipol bae sei iu luk naes, and mekem iu feel spesol.
2 Iu tekem wanfala hand mill and smasem wheat for kamap flour.
Aotem kaleko wea kavarem feis blo iu.
Tekem aot long skirt blo iu, mekem leg blo iu showaot,
And akrosim olketa river.
3 Pipol bae lukim naked body blo iu.
And wei wea iu shame bae showaot klia.
Mi bae pei bak, and no eni man bae stopem mi.*
4 “Datfala Man wea baem iumi bakNem blo hem Jehovah, komanda blo olketa army,Hem Holy Wan blo Israel.”
5 Dota blo olketa Chaldea,Iu sidaon kwaet and go lo dark ples.
No enitaem moa bae olketa kolem iu Queen blo olketa Kingdom.
6 Mi barava kros lo pipol blo mi.
Mi mek shame lo olketa wea mi nao onam,And mi givim olketa lo hand blo iu.
Bat iu nating showim mercy lo olketa.
Nomata old pipol blo olketa tu, iu putim yoke* wea hevi tumas lo olketa.
7 Iu sei: “Mi bae stap olsem Queen for olowe.”
Iu nating tingim olketa samting hia lo heart blo iu.
Iu nating ting raonem samting wea bae kamaot bihaen.
8 Iu herem diswan, iu woman wea laekem tumas for enjoy,Iu wea feel sef, wea sei lo heart blo iu:
“Mi nomoa mi important, and no eniwan moa.
Mi bae no kamap wanfala widow woman.
Mi bae no enitaem savve lo feeling for lusim pikinini.”
9 Bat tufala samting hia bae kasem iu semtaem, lo wan day nomoa:
Iu bae lusim pikinini and kamap widow woman.
Olketa samting hia bae barava spoelem iuBikos iu duim staka magic samting and strong paoa blo iu for cursim narawan.
10 Iu trustim olketa nogud samting wea iu duim.
Iu sei: “No eniwan lukim mi.”
Wisdom blo iu and knowledge wea iu garem nao leadim iu go difren,And iu sei lo heart blo iu: “Mi nomoa mi important, and no eniwan moa.”
11 Bat trabol bae kasem iu,And no eni magic samting wea iu duim bae stopem datwan.*
Hard taem bae kasem iu, bae iu no savve misstim.
Trabol bae seknomoa kasem iu, wea iu no enitaem savve abaotem.
12 Iu gohed cursim olketa narawan, and duim olketa magic samting blo iu,Wea iu waka hard for duim taem iu young.
Maet bae iu kasem gud samting from datwan.
Maet pipol bae sapraes lo wanem iu duim.
13 Staka wea advaesem iu mekem iu kamap taed.
Letem olketa kam distaem and sevem iu,Olketa wea worshipim skae,* olketa wea lukluk lo olketa star,Olketa wea givim savve lo taem blo olketa niu moonAbaotem olketa samting wea bae kasem iu.
14 Lukim! Olketa olsem drae grass.
Wanfala fire bae bonem olketa.
Olketa no savve sevem olketa seleva* from strong blo fire wea laet.
Olketa chakol hia hem no for keepim man warm,And disfala fire hem no for man sidaon front lo hem.
15 So olketa blo iu wea duim magic bae kamap olsem tu,Olketa wea iu waka hard witim taem iu young.
Olketa bae go olobaot, each wan followim road blo hemseleva.*
Bae no eniwan stap for sevem iu.
Olketa footnote
^ Or maet, “and mi bae no kaen lo eniwan wea mi meetim.”
^ Lukim “Yoke” lo Dictionary.
^ Or, “And iu bae no savve hao for iusim magic for ronem aot datwan.”
^ Or maet, “Olketa wea divaedem skae. Olketa astrologer.”
^ Or, “soul blo olketa.”
^ Heb., “area blo hemseleva.”
