Jeremiah 24:1-10
-
Olketa gud fig and olketa nogud fig (1-10)
24 Bihaen King Nebuchadnezzar* blo Babylon tekem Jeconiah,* son blo Jehoiakim, wea hem king blo Judah, witim olketa leader lo Judah, olketa man wea garem skill for duim evri difren kaen waka, and olketa man wea savve wakem samting from metal,* from Jerusalem go lo Babylon for prisoner, Jehovah showim mi lo wanfala vision tufala basket fig frut wea stap front lo temple blo Jehovah.
2 Wanfala basket hem garem olketa fig frut wea barava gud, wea olsem olketa fig frut wea raep lo first season,* bat nara basket hem garem olketa fig frut wea nogud and no eniwan fit for kaikaim bikos olketa barava nogud.
3 Then Jehovah askem mi: “Wat nao iu lukim Jeremiah?” So mi sei: “Olketa fig frut. Olketa gud fig frut hem barava gud, bat olketa nogud fig frut hem barava nogud and no eniwan fit for kaikaim.”
4 Then mi kasem disfala toktok from Jehovah:
5 “Diswan nao wanem Jehovah, God blo Israel, hem talem, ‘Olketa blo Judah wea prisoner, wea mi sendem olketa from disfala ples go lo land blo olketa Chaldean, olketa nao olsem olketa gud fig frut hia. Mi bae duim gud samting for olketa.
6 Eye blo mi lukluk lo olketa for lukaftarem olketa, and mi bae mekem olketa for kam bak lo disfala land. Mi bae buildimap olketa and mi bae no pisisim olketa. Mi bae plantim olketa and mi bae no pullimaot olketa.
7 And mi bae givim lo olketa wanfala heart wea willing for savve lo mi, dat mi nao Jehovah. Olketa bae kamap pipol blo mi, and mi bae God blo olketa bikos olketa bae kam bak lo mi witim full heart blo olketa.
8 “‘Bat olketa nogud fig frut barava nogud and no eniwan fit for kaikaim, diswan nao wanem Jehovah talem: “Hem nao hao mi bae ting lo King Zedekiah blo Judah, olketa leader blo hem, datfala smol sekson blo olketa blo Jerusalem wea stap yet lo disfala land, and olketa wea stap lo land lo Egypt.
9 And mi bae mekem olketa kamap samting wea evri kingdom lo earth fraetem taem olketa lukim trabol wea mi bae mekem for kasem olketa. Pipol bae tok spoelem olketa, and storyim olketa olsem example blo pipol wea kasem trabol. Pipol bae tok spoelem olketa and talem olketa nogud samting lo olketa lo evri ples wea mi sendem olketa go lo hem.
10 And mi bae iusim sword, bigfala hangere, and sik for killim olketa dae, go kasem taem olketa finis from disfala land wea mi givim lo olketa and lo olketa grandadi blo olketa.”’”
Olketa footnote
^ Heb., “Nebuchadrezzar,” diswan hem nara wei for spellim datfala nem.
^ Nara tufala nem blo hem Jehoiachin and Coniah.
^ Or maet, “olketa wea repairim olketa wall.”
^ Diswan hem olketa first fig frut wea olketa harvestim lo olketa first month lo year.
