Jeremiah 28:1-17
-
Jeremiah and false profet Hananiah (1-17)
28 Lo datfala sem year, lo start lo rul blo King Zedekiah blo Judah, lo mek-foa year, lo mek-faev month, profet Hananiah, son blo Azzur, from Gibeon, sei lo mi insaed lo haos blo Jehovah front lo olketa priest and evri pipol lo there:
2 “Diswan nao wanem Jehovah, komanda blo olketa army, wea hem God blo Israel, hem talem, ‘Mi bae brekem yoke* blo king blo Babylon.
3 Insaed tu years* mi bae tekem kam bak lo disfala ples evri utensil blo haos blo Jehovah wea King Nebuchadnezzar blo Babylon tekem from disfala ples for go lo Babylon.’”
4 “‘And mi bae tekem kam bak lo disfala ples Jeconiah, son blo Jehoiakim, wea hem king blo Judah, and evriwan from Judah wea go prisoner lo Babylon,’ hem nao wanem Jehovah talem, ‘bikos mi bae brekem datfala yoke blo king blo Babylon.’”
5 Then profet Jeremiah story lo profet Hananiah front lo olketa priest and evri pipol wea standap insaed lo haos blo Jehovah.
6 Profet Jeremiah sei: “Amen!* Jehovah nao bae duim diswan! Jehovah nao bae mekem toktok blo profesi blo iu kam tru taem hem bae tekem kam bak lo disfala ples olketa utensil lo haos blo Jehovah and evri pipol wea prisoner lo Babylon!
7 Bat, plis, herem disfala message wea mi bae talem lo ear blo iu and lo ear blo evri pipol hia.
8 Longtaem bifor, olketa profet wea laef bifor lo mi and bifor lo iu savve talem olketa profesi abaotem war, bigfala trabol, and bigfala sik wea kasem olketa land and olketa strongfala kingdom.
9 Sapos wanfala profet talem profesi abaotem peace and toktok blo datfala profet hem kam tru, then bae iumi savve dat Jehovah nao sendem datfala profet.”
10 Taem profet Hananiah herem datwan nomoa hem tekem aot yoke from nek blo profet Jeremiah and brekem datwan.
11 Then Hananiah tok olsem front lo evri pipol lo there: “Diswan nao wanem Jehovah talem, ‘Hem nao hao mi bae brekem yoke blo King Nebuchadnezzar blo Babylon from nek blo evri nation insaed lo tu years.’” Then profet Jeremiah lusim olketa and hem go.
12 Bihaen profet Hananiah brekem yoke from nek blo profet Jeremiah, Jeremiah kasem disfala message from Jehovah:
13 “Go and tok olsem lo Hananiah, ‘Diswan nao wanem Jehovah talem: “Iu brekem finis olketa wooden yoke, and iu wakem olketa iron yoke for changem lo olketa.”
14 Bikos diswan nao wanem Jehovah, komanda blo olketa army, wea hem God blo Israel, hem talem: “Mi bae putim iron yoke lo nek blo evri nation hia, mekem olketa stap anda lo King Nebuchadnezzar blo Babylon, and olketa mas stap anda lo paoa blo hem. Nomata olketa wild animal lo bush mi givim olketa for stap anda lo paoa blo hem.”’”
15 Then profet Jeremiah sei lo profet Hananiah: “Plis, lisin, O Hananiah! Jehovah nating sendem iu bat iu mekem pipol hia for bilivim samting wea no tru.
16 So diswan nao wanem Jehovah talem, ‘Lukim! Mi bae endim laef blo iu. Dis year iu bae dae bikos iu encouragem pipol hia for bighed againstim Jehovah.’”
17 So profet Hananiah dae lo datfala sem year, lo mek-seven month.
Olketa footnote
^ Lukim “Yoke” lo Dictionary.
^ Heb., “olketa year blo olketa day.”
^ Or, “Hem mas olsem nao!”
