Job 10:1-22
10 “Mi barava heitim* laef blo mi.
Mi bae aotem olketa komplen blo mi.
Mi bae talemaot bigfala hard taem wea kasem mi!*
2 Mi bae sei lo God: ‘No judgem mi guilty.
Talem mi why nao iu faet againstim mi.
3 Hao, iu kasem eni gud samting taem iu treatim man nogud,Taem iu ting daonem samting wea hand blo iu wakemAnd lo semtaem iu hapi lo advaes blo wicked pipol?
4 Hao, iu garem eye olsem olketa man,*Or iu lukim samting olsem hao man wea savve dae hem lukim samting?
5 Hao, olketa day blo iu olsem olketa day blo man wea savve dae,Or hao, olketa year blo iu olsem olketa year blo wanfala man,
6 Mekem iu lukaotem rong wea mi duimAnd gohed for faendem eni sin wea mi duim?
7 Iu savve dat mi no guilty.And no eniwan savve sevem mi from hand blo iu.
8 Hand blo iu nao sheipim mi and wakem mi,Bat distaem iu redi for distroem mi.
9 Plis, tingim, iu mekem mi from clay,Bat distaem iu mekem mi for go bak lo dust.
10 Hao, iu no pourim mi olsem milkAnd mekem mi kamap thik olsem cheese?
11 Iu iusim skin and flesh for kavarem mi olsem kaleko,And iu iusim olketa bon and sinew for formim body blo mi.
12 Iu givim mi laef and loyal love.*Iu protectim mi* taem iu lukaftarem mi gud.
13 Bat iu plan haed for duim olketa samting hia.*
Mi savve olketa samting hia kam from iu ia.
14 Sapos mi duim sin, iu bae lukluk lo mi,And iu bae no forgivim olketa rong samting wea mi duim.
15 Sapos mi guilty, sorre lo mi nao!
And nomata sapos mi innocent, mi no savve apim hed blo mi nao,Bikos mi shame tumas and mi kasem bigfala pain.
16 Sapos mi apim hed blo mi, iu bae lukaotem mi olsem wanfala lion wea lukaotem kaikai blo hemAnd iu bae showim paoa blo iu moa againstim mi.
17 Iu tekem kam olketa niu witness moa for againstim miAnd iu kros go moa lo mi,And trabol afta trabol hem kasem mi.
18 So why nao iu tekem mi aot from bele blo mami blo mi?
Mi shud dae nomoa bifor eni eye hem lukim mi.
19 Hem bae olsem mi no exist nomoa.Olketa bae tekem mi from bele blo mami blo mi go stret lo grev.’
20 Olketa day blo mi no staka nao. Leavim hem go from mi.Leavim hem tanem eye blo hem from mi, mekem mi garem peace* lelebet
21 Bifor mi go—and mi bae no kam bak—Lo land wea dark tumas,*
22 Lo land wea dark fogud,Wanfala land blo thik darkness and wea no organize,Wea nomata laet hem olsem dark.”
Olketa footnote
^ Or, “Soul blo mi barava heitim.”
^ Or, “soul blo mi.”
^ Heb., “eye blo flesh.”
^ Lukim “Loyal Love” lo Dictionary.
^ Or, “spirit blo mi. Brith blo mi. Laef blo mi.”
^ Heb., “And olketa samting hia stap haed insaed heart blo iu.”
^ Or, “hapi.”
^ Or, “blo dark and shadow blo dae.”
