Job 13:1-28
13 “Yes, eye blo mi lukim evri samting hia,Ear blo mi herem and mi minim gud.
2 Samting wea iufala savve lo hem, mi savve lo hem tu.Mi semsem olsem iufala nomoa.
3 Dastawe mi laek for story lo Olmaeti seleva nao.Mi laek for presentim case blo mi lo God.
4 Bat iufala talem olketa laea samting for spoelem nem blo mi.Evriwan lo iufala olketa iusles doctor.
5 Sapos iufala stap kwaet nomoa,Datwan bae showim iufala garem wisdom.
6 Plis, herem taem mi presentim case blo mi,And ting raonem wanem mi talem for defendim miseleva.
7 Hao, bae iufala talem samting wea no followim justice lo nem blo God,And bae iufala talem samting wea no tru on behalf lo hem?
8 Hao, bae iufala saedem hem,*Hao, bae iufala trae for sapotim tru God lo disfala case?
9 Sapos God lukluk lo iufala, hao, bae hem hapi?
Hao, iufala savve laea lo hem olsem iufala laea lo man wea savve dae?
10 Hem bae tok strong lo iufalaSapos iufala trae for haedem wei wea iufala fevarem God.
11 Hao, glory blo hem bae no mekem iufala fraetAnd bae iufala fraet tumas lo hem?
12 Olketa wise toktok blo iufala* hem olketa saying blo asis.Olketa samting wea iufala talem for defendim iufala seleva* hem no strong olsem clay.
13 Iufala stap kwaet mekem mi story.
Then letem eniting wea happen lo mi, happen lo mi nao!
14 Why nao mi putim miseleva lo danger*And mi putim laef* blo mi lo hand blo mi?
15 Nomata maet hem killim mi dae, mi bae gohed for weit.Mi bae presentim case* blo mi front lo feis blo hem.
16 Then hem bae kamap salvation blo mi,Bikos no eniwan wea wicked* savve kam front lo hem.
17 Lisin gud lo toktok blo mi.Herem samting wea mi talem.
18 Lukim, mi redi for presentim case blo mi distaem.Mi savve mi nao mi stret.
19 Hu nao bae pruvim dat mi rong?
Mi bae dae sapos mi no toktok!*
20 Plis God, tufala samting nao mi laek askem lo iu,*Mekem mi no haedem miseleva from iu:
21 Aotem hevi hand blo iu and putim farawe from mi,And no gohed for mekem mi fraet.
22 Iu story firstaem, and mi bae ansarem iu,Or iu letem mi story firstaem, and iu ansarem mi.
23 Wat nao olketa mistek and sin wea mi duim?
Storyim lo mi olketa rong samting and sin wea mi duim.
24 Why nao iu haedem feis blo iuAnd ting lo mi olsem enemy blo iu?
25 Hao, bae iu trae for mekem wanfala leaf wea wind hem blowim for fraetOr bae iu ran bihaen lo drae grass?
26 Bikos iu gohed for raetem olketa nogud samting wea iu accusim lo mi,And iu mekem mi kasem panis for olketa sin wea mi duim taem mi young.
27 Iu putim tufala foot blo mi lo stock,Iu lukluk lo evri ples wea mi go,And iu watchim each footprint blo mi.
28 So man* olsem samting wea rotten wea iusles nomoa,Olsem wanfala kaleko wea olketa moth kaikaim.
Olketa footnote
^ Or, “fevarem hem.”
^ Or, “toktok blo iufala wea man no savve forgetim.”
^ Heb., “shield boss blo iufala.”
^ Heb., “Why nao mi karem flesh blo mi lo teeth blo mi?”
^ Or, “soul.”
^ Or, “defendim olketa wei.”
^ Or, “apostate.”
^ Or maet, “Sapos eniwan savve duim datwan, mi bae no talem eniting and dae.”
^ Heb., “tufala samting nomoa, iu no duim lo mi.”
^ Heb., “hem.” Maet hem Job.
