Job 14:1-22
14 “Man, wea born from woman,Hem laef for lelebet taem nomoa and laef blo hem fulap lo trabol.*
2 Hem olsem flaoa and then hem drae nao.*Hem ranawe olsem shadow and hem lus nao.
3 And why nao eye blo iu lukluk strong tumas lo hem?Why nao iu tekem hem* lo kot?
4 Hao, samwan wea klin savve kam from samwan wea no klin?
Hard tumas!
5 Sapos days blo hem set finis,Namba blo olketa month blo hem lo hand blo iu.Iu nao putim limit for laef blo man and hem no savve ovam datwan.
6 Iu no lukluk moa lo hem mekem hem savve rest,Hem olsem wanfala wakaman wea kasol. Letem hem finisim waka blo hem for datfala day.
7 Nomata tree bat garem hope tu.
Sapos olketa katem daon, hem bae grow moa,And niu branch blo hem bae gohed for grow.
8 Sapos rut blo hem kamap old lo graonAnd stump blo hem dae lo graon,
9 Nomata lelebet wata tasim hem bae hem grow nao.And hem bae garem olketa branch olsem niu plant.
10 Bat man savve dae and evri strong blo hem finis nao.Taem man hem dae, wea nao hem?
11 Olketa wata savve lus from sea,And river savve evaporate and hem drae.
12 Man savve leidaon tu and no getap.
Lo full taem wea skae hem stap, olketa bae no wekap,Olketa bae no wekap from sleep blo olketa.
13 Plis iu haedem mi insaed lo Grev,*Iu haedem mi go kasem taem wea kros blo iu hem finis,Iu markem taem for mi and then rememberim mi!
14 Sapos man hem dae, hao, hem savve laef bak moa?
Mi bae weit go kasem taem wea olketa day wea mi slave hem finis*Go kasem taem wea mi bae kamap free.
15 Iu bae kol, and mi bae ansarem iu.
Iu bae laekem tumas for lukim mi wea hand blo iu creatim.
16 Bat lo distaem, iu gohed kaontem evri step blo mi.Iu lukluk nomoa for sin wea mi duim.
17 Iu putim olketa rong samting wea mi duim insaed wanfala bag,And iu sealim sin wea mi duim witim glue.
18 Olsem wanfala maunten hem foldaon and hem pisisAnd wanfala rock hem aot from ples blo hem,
19 Olsem wata hem changem sheip blo stonAnd hem wasimaot graon blo earth,Hem nao hao iu distroem hope blo man wea savve dae.
20 Iu gohed daonem hem go kasem taem hem dae.Iu changem lukluk blo hem, and iu sendem hem go.
21 Olketa son blo hem kasem honor, bat hem no savve lo datwan.Olketa lusim position blo olketa, bat hem no luksavve lo datwan.
22 Hem feelim pain nomoa taem body* blo hem laef yet.Hem* sorre nomoa taem hem laef yet.”
Olketa footnote
^ Or, “wari.”
^ Or maet, “and hem dae nao.”
^ Heb., “mi.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Diswan hem insaed lo grev.
^ Heb., “flesh.”
^ Or, “Soul blo hem.”
