Job 2:1-13
2 Bihaen, lo day for olketa son blo tru God* kam standap front lo Jehovah, Satan tu hem kam midolwan lo olketa and standap front lo Jehovah.
2 Then Jehovah sei lo Satan: “Iu stap kam lo wea ia?” Satan sei lo Jehovah: “Mi go raraon lo earth and wakabaot lo hem.”
3 And Jehovah sei lo Satan: “Hao, iu lukluk lo* servant blo mi Job? No eni man olsem hem lo earth. Hem wanfala raeteous man and hem faithful.* Hem fraet lo God and hem no laek for duim nogud samting. Hem gohed for faithful, nomata iu laekem for mi spoelem* hem nating nomoa.”
4 Bat Satan sei lo Jehovah: “Skin for skin. Man bae givim evriting wea hem garem for sevem laef* blo hem.
5 Bat iu trae liftim hand blo iu firstaem and spoelem bon blo hem and body* blo hem, and hem bae tok spoelem iu front lo feis blo iu.”
6 Then Jehovah sei lo Satan: “Lukim! Hem lo hand blo iu!* Bat iu mas no finisim laef* blo hem!”
7 So Satan go aot from front lo* Jehovah and hem mekem Job for garem olketa boela wea pain tumas,* start andanit lo foot blo hem go kasem antap lo hed blo hem.
8 And Job tekem wanfala pis blo clay pot wea brek for skrasem lo body blo hem, and hem sidaon lo asis.
9 Gogo, waef blo hem sei lo hem: “Hao, iu gohed faithful yet? Why nao iu no tok spoelem God and dae nomoa?”
10 Bat hem sei lo waef blo hem: “Toktok blo iu hem olsem toktok blo karangge woman. Hao, iumi shud acceptim nomoa gud samting from tru God and no acceptim tu nogud samting?” Nomata evri samting hia kasem Job, hem no talem eni samting wea mekem hem sin.*
11 Thrifala fren blo* Job herem evri nogud samting wea kasem hem, and each wan lusim ples blo hem and kam. Olketa hia nao Eliphaz, datfala Temanite, Bildad, datfala Shuhite, and Zophar, datfala Naamathite. So olketa agree for meet lo wanfala ples and go for sorre witim Job and comfortim hem.
12 Taem olketa farawe yet and lukim hem, olketa no luksavve lo hem. Olketa start for krae big and brekem kaleko blo olketa, and olketa torowem dust lo air and dust foldaon lo hed blo olketa.
13 Then olketa sidaon lo graon witim hem for sevenfala day and sevenfala naet. No eniwan lo olketa talem eni toktok lo hem bikos olketa lukim hem kasem bigfala pain.
Olketa footnote
^ Diswan hem kam from wanfala Hebrew toktok wea minim olketa angel blo God.
^ Heb., “heart blo iu tingim.”
^ Or, “man wea no garem blame and raeteous man.”
^ Heb., “swallom.”
^ Or, “soul.”
^ Heb., “flesh.”
^ Or, “Iu nao kontrolem hem.”
^ Or, “soul.”
^ Heb., “feis blo.”
^ Or, “bigfala soa.”
^ Heb., “hem no sin lo lips blo hem.”
^ Or, “man wea savve lo.”
