Job 24:1-25
24 “Why nao Olmaeti no markem wanfala taem?
Why nao olketa wea savve lo hem no lukim day blo hem?*
2 Pipol muvim olketa mark blo olketa baondri.Olketa stealim olketa sheepsheep and putim witim olketa sheepsheep blo olketa seleva.
3 Olketa tekem donkey blo olketa pikinini wea no garem dadiAnd olketa tekem bull blo widow woman olsem security for loan.
4 Olketa stopem poor pipol for wakabaot lo road.Pipol blo earth wea no garem eniwan for helpem olketa mas haed from olketa hia.
5 Poor pipol go faend kaikai olsem olketa wild donkey lo wilderness.Olketa lukaotem kaikai lo desert for olketa pikinini blo olketa.
6 Olketa mas harvestim kaikai from garden blo narawan*And olketa pikim leftova from grape planteison blo wicked pipol.
7 Lo naet olketa naked nomoa, olketa no garem eni kaleko.Olketa no garem eniting for kavarem olketa from cold.
8 Olketa full tuwet from rain lo maunten.Olketa hol taet lo olketa rock bikos olketa no garem ples for haed lo hem.
9 Olketa pullim pikinini wea no garem dadi from susu blo mami blo hem.And olketa tekem olketa kaleko blo poor pipol olsem security for loan,
10 Wea mekem olketa for wakabaot naked nomoa, and no garem kaleko,And olketa hangere taem olketa karem olketa bandol grain.
11 Lo taem wea sun hem hot, olketa waka hard followim olketa wall ston saed lo hill.*Olketa stepim olketa grape lo ples for smasem grape for mekem wine, nomata olsem olketa thirsty nomoa.
12 Olketa wea klosap dae gohed krae lo taon.Olketa wea garekil nogud* krae for help,Bat God nating warim datwan nomoa.*
13 Olketa wea bighed againstim laet olketa stap.Olketa no laek for savve lo olketa wei blo hem,And olketa no followim road blo hem.
14 Man wea murder getap lo early morning.Hem killim dae olketa wea no garem eniwan for helpem olketa and olketa wea poor,And lo naet hem savve go steal.
15 Man wea duim adultery hem lukluk and weit for taem hem start for dark,Hem sei, ‘No eniwan bae lukim mi!’
And hem kavarem feis blo hem.
16 Lo naet olketa brek in* lo olketa haos.Lo daytaem olketa haed insaed haos blo olketa seleva.
Olketa no savve lo daylaet.
17 Bikos morning hem semsem olsem bigfala darkness lo olketa.Olketa savve gud lo olketa samting wea savve mekem man fraet fogud lo bigfala darkness.
18 Bat kwiktaem nomoa wata tekem olketa go.*
Trabol kasem land blo olketa.
Olketa bae no go bak lo grape planteison blo olketa.
19 Olsem drae season and hot hem aotem snow wea melt,Grev* hem tekem olketa wea duim sin!
20 Mami blo hem* bae forgetim hem. Maggot bae kaikaim hem.
No eniwan bae rememberim hem.
And olketa wea no raeteous bae brek olsem wanfala tree.
21 Hem treatim nogud lo woman wea no savve garem pikinini,And hem treatim nogud lo widow woman.
22 God* bae iusim strong blo hem for finisim olketa wea paoaful.Nomata olketa kasem paoa, olketa no sure sapos olketa bae laef or nomoa.
23 God* letem olketa for confident and feel sef,Bat hem lukim evri samting wea olketa duim.*
24 Pipol mekhae lo olketa for lelebet taem, then olketa nomoa nao.
Olketa daonem olketa and olketa dae olsem evri narawan.Olketa dae olsem olketa bunch grain wea olketa katem.
25 So hu nao savve pruvim mi man for laeaOr sei toktok blo mi hem no tru?”
Olketa footnote
^ Diswan hem day blo hem for judge.
^ Or maet, “harvestim kaikai blo olketa animal lo garden.”
^ Or maet, “olketa smasem olketa olive for mekem oil followim olketa wall ston saed lo hill.”
^ Or, “Olketa soul wea garekil.”
^ Or maet, “God no sei eniwan hem guilty.”
^ Heb., “dig go insaed.”
^ Heb., “Hem go pas kwiktaem antap lo wata.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Heb., “Basket blo baby blo mami.”
^ Heb., “Hem.”
^ Heb., “Hem.”
^ Heb., “olketa wei blo olketa.”
