Job 29:1-25
29 Job gohed lo story* blo hem. Hem sei:
2 “Mi wish nomoa laef blo mi distaem hem olsem olketa month wea go pas,Lo taem wea God hem lukaftarem mi,
3 Taem lamp blo hem shaen antap hed blo mi,Taem laet blo hem torchim dark road wea mi wakabaot followim,
4 Taem* mi young and strong,Taem mi fren gud witim God,
5 Taem Olmaeti hem stap yet witim mi,Taem olketa pikinini* blo mi stap raonem mi,
6 Taem mi garem staka butter,And olketa rock pourim staka oil for mi.
7 Taem mi savve go lo gate blo taonAnd sidaon lo pablik area lo taon,
8 Olketa young man lukim mi and muv aot,*And nomata olketa old man getap and gohed standap.
9 Olketa prince no talem eni samting.Olketa satem mouth blo olketa witim hand blo olketa.
10 Olketa bigman no savve talem eniting nao.Tongue blo olketa pas antap lo insaed lo mouth blo olketa.
11 Eniwan wea herem mi hem talem gud samting abaotem mi,And olketa wea lukim mi olketa givim witness for mi.
12 Bikos mi rescuem olketa wea poor wea krae for help,And pikinini wea no garem dadi and eniwan wea no garem samwan for helpem hem.
13 Man wea klosap for dae hem talem gud samting abaotem mi,And mi mekem heart blo widow woman for hapi.
14 Mi werem raeteous fasin olsem kaleko blo mi.Justice blo mi hem olsem wanfala long kaleko* and wanfala turban.*
15 Mi olsem eye for olketa wea blindAnd leg for olketa wea kripol.
16 Mi dadi for olketa wea poor.Mi investigatem case blo olketa wea mi no savve lo olketa.
17 Mi brekem jaw blo man wea duim samting wea no stretMi rescuem olketa wea hem attakim.
18 Bifor mi savve sei, ‘Bae mi dae lo haos* blo miseleva,And olketa day blo mi bae staka olsem sandbis.
19 Olketa rut blo mi spred aot kasem olketa wata,And dew stap lo olketa branch blo mi full naet.
20 Pipol evritaem respectim mi,And mi gohed for sut lo bow insaed hand blo mi.’
21 Pipol hapi for lisin,Olketa stap kwaet for herem advaes blo mi.
22 Bihaen mi story, olketa no savve talem eniting moa.Olketa toktok blo mi here naes* lo ear blo olketa.
23 Olketa weit for mi olsem olketa weit for rain.Olketa openem big mouth blo olketa olsem pipol wea weitim rain blo spring season.*
24 Taem mi smile for olketa, olketa hapi fogud.Laet blo feis blo mi hem comfortim olketa.*
25 Mi givim direction lo olketa from mi leader blo olketa,And mi stap olsem wanfala king midol lo olketa soldia blo hem,Olsem man wea comfortim olketa wea krae.
Olketa footnote
^ Heb., “proverb.”
^ Heb., “Lo olketa day wea.”
^ Or, “servant.”
^ Heb., “haed.”
^ Or, “coat wea no garem sleeve.”
^ Lukim “Turban” lo Dictionary.
^ Heb., “insaed nest.”
^ Heb., “isisi drop.”
^ Lukim App. B15.
^ Or maet, “Olketa no mekem laet blo feis blo mi hem dark.”
