Job 32:1-22
32 So thrifala man hia no savve wat for talem moa lo Job bikos hem barava sure hem no duim eni rong samting.*
2 Bat Elihu, son blo Barachel, datfala Buzite from famili laen blo Ram, hem kros tumas. Hem kros lo Job bikos Job trae for pruvim dat hem* nao stret and no God.
3 Hem barava kros tu lo thrifala fren blo Job bikos olketa no talem stret samting bat olketa talem dat God hem wicked.
4 Elihu laek for story bat hem weit for Job finisim story blo hem bikos olketa olo winim hem.
5 Taem Elihu lukim thrifala man hia no savve talem eniting, hem just kros go moa.
6 So Elihu, son blo Barachel, datfala Buzite, start for story. Hem sei:
“Mi young*And iufala olo finis.
Dastawe mi no toktok bikos mi respectim iufala,And mi hol bak for talem iufala samting wea mi savve lo hem.
7 Mi sei, ‘Letem olketa wea olo story,And letem olketa wea year blo olketa staka talemaot wisdom.’
8 Bat holy spirit wea God givim lo pipol,And brith from Olmaeti nao mekem olketa for garem wei for minim samting.
9 Nomata wanem nao age blo man, datwan* no mekem hem wise,And ino olketa old man nomoa savve lo stret samting.
10 So mi sei, ‘Lisin lo mi,And mi bae talem iu tu samting wea mi savve lo hem.’
11 Lukim! Mi weit for iufala toktok.Mi gohed lisin taem iufala storyim tingting blo iufalaTaem iufala lukaotem wat for talem.
12 Mi lisin gud lo iufala,Bat no eniwan lo iufala pruvim dat Job hem rong*Or koment abaot wat hem talem.
13 So no sei, ‘Mifala faendem wisdom.God nao savve pruvim hem rong, ino man.’
14 Hem nating talem eni toktok againstim mi,So taem mi story lo hem bae mi no storyim olketa sem samting wea iufala storyim.
15 Olketa seke fogud, no eni toktok stap nao.Olketa no garem eniting for talem.
16 Mi weit, bat olketa no story nao.Olketa standap nomoa lo there and no talem eniting.
17 So mi tu bae talem samting.Mi tu bae storyim samting wea mi savve lo hem,
18 Bikos mi garem staka samting for storyim.Strongfala feeling* hem muvim mi for duim diswan.
19 Mi feelim pressure insaed lo mi,Hem olsem niu skin botol wea fulap lo wine and redi for bosta.
20 Leavim mi story mekem mi feel gud!
Mi bae openem lips blo mi and talem wat mi laek storyim.
21 Mi bae no saedem eniwan.And mi bae no switim* eniwan,
22 Bikos mi no savve hao for switim eniwan.Sapos mi duim datwan, semtaem nomoa bae Creator blo mi killim mi dae.
Olketa footnote
^ Or, “raeteous lo eye blo hemseleva.”
^ Or, “soul blo hem.”
^ Heb., “Olketa day blo mi smol.”
^ Or, “Staka day blo man.”
^ Or, “stretem Job.”
^ Heb., “Spirit.”
^ Or, “no givim title lo.”
