Job 39:1-30
39 “Hao, iu savve lo taem maunten goat bornem baby blo hem?
Hao, enitaem iu lukim deer bornem baby blo hem?
2 Hao, iu savve haomas month nao olketa karem baby lo bele?
Hao, iu savve lo taem wea olketa savve bornem baby?
3 Olketa bendaon taem olketa bornem baby blo olketa,And pain for bornem baby hem stop.
4 Baby blo olketa kamap strong and grow ap lo bush.Olketa go aot and no kam bak lo olketa.
5 Hu nao letem wild donkey* for go free,And hu nao aotem olketa rope from wild donkey?
6 Mi mekem wilderness kamap haos blo hemAnd solt land kamap ples blo hem for stap.
7 Hem avoidim noes blo taon.Hem no herem man wea singaot for hem waka.
8 Hem raraon lo olketa hill for lukaotem kaikai,Hem lukaotem evri green plant.
9 Hao, wild bull hem willing for waka for iu?
Hao, bae hem sleep lo naet lo haos blo iu for keepim animal?*
10 Hao, bae iu taengem rope lo wild bull and forcem hem for houm garden for iu,Or bae hem followim iu for houm valley?
11 Hao, bae iu trustim barava big paoa blo hemAnd letem hem for duim olketa bigfala waka for iu?
12 Hao, bae iu depend lo hem for karem kam bak harvest* blo iu,And hao, bae hem hipim datwan lo ples for aotem grain from skin blo hem?
13 Ostrich bird flapim wing blo hem bikos hem hapi,Bat hao, wing and olketa feather blo hem semsem olsem blo stork?
14 Hem leavim olketa egg blo hem lo graon,And hem keepim olketa for warm insaed lo dust.
15 Hem no tingim dat foot blo samwan savve stepim olketaOr wanfala wild animal savve stepim olketa.
16 Hem treatim nogud lo olketa son blo hem, olsem olketa hia no pikinini blo hem.Hem nating kea nomoa sapos hem hard waka nating.
17 Bikos God tekem wisdom from hem*And hem nating givim hem eni wei for minim samting.
18 Bat taem hem standap and flapim wing blo hem,Hem laf lo horse and man wea raedem.
19 Hao, iu nao givim paoa lo horse?
Hao, iu nao mekem hem werem hair lo nek blo hem?
20 Hao, iu savve mekem hem jamp olsem locust?*
Taem hem brith big datwan savve mekem man fraet fogud.
21 Hem digim graon insaed lo valley and hapi lo strong blo hem.Hem speed go for faet.*
22 Hem laf lo fraet and hem nating fraetem eniting.
Hem nating tane bak nomata lo sword.
23 Basket blo arrow hem mek noes saed lo hem,Spia and javelin hem shaen.
24 Hem no savve standap kwaet bikos hem hapi, hem full speed go nao,*Hem no savve standap kwaet taem* hem herem saond blo horn.
25 Taem olketa blowim horn, hem sei, ‘Yes!’
Hem smelem faet from farawe yetAnd hem herem singaot blo olketa komanda and singaot lo taem blo faet.
26 Hao, iu nao teachim falcon hao for flae,Iu nao teachim hem for flae go lo south?
27 Or iu nao givim komand lo eagle for flae go apAnd buildim nest blo hem lo barava hae ples?
28 Hem sleep lo naet lo wanfala klif,And hem stap lo wanfala big ston* lo ples wea hem sef.
29 Hem stap lo there and luk for kaikai.Eye blo hem lukim olketa samting wea stap farawe.
30 Olketa pikinini blo hem drinkim blood.And eni ples wea olketa dead body stap, hem lo there tu.”
Olketa footnote
^ Or, “onager.”
^ Or, “container blo animal for kaikai lo hem.”
^ Heb., “seed.”
^ Heb., “mekem hem forgetim wisdom.”
^ Wanfala type insect wea olsem grashopa.
^ Heb., “Hem go aot for meetim kaleko for faet.”
^ Heb., “hem swallom graon (earth).”
^ Or maet, “no savve bilivim dat.”
^ Heb., “teeth blo wanfala ston.”
