Job 40:1-24
40 Jehovah gohed story olsem lo Job:
2 “Hao, eni man fit for raoa witim Olmaeti and sei Hem rong?
Sapos eniwan laek for stretem God, story kam nao.”
3 Then Job sei lo Jehovah:
4 “Lukim! Mi iusles nomoa.
Wat moa bae mi talem lo iu?
Mi putim hand blo mi satem mouth blo mi.
5 Mi story staka taem finis.Bat mi bae no story or talem eni samting moa.”
6 Then Jehovah tok kam lo Job from wanfala big wind. Hem sei:
7 “Iu redi, plis, act olsem wanfala man.Mi bae kwestinim iu, and iu ansarem mi kam.
8 Hao, bae iu trae for pruvim dat mi no followim justice?*
Hao, bae iu talem dat mi guilty for pruvim iu nao iu stret?
9 Hao, iu garem hand wea paoaful olsem hand blo tru God,Or hao, voice blo iu here olsem voice blo hem, wea here olsem thunder?
10 Plis, decoratem iuseleva witim glory and bigfala paoa.Werem respect and luk naes olsem kaleko blo iu.
11 Aotem bigfala kros blo iu.Lukim eniwan wea praod, and daonem hem.
12 Lukim eniwan wea praod, and mek shame lo hem,And stepim wicked wan lo ples wea hem standap.
13 Haedem olketa evriwan insaed lo graon.Lokim olketa* insaed lo dark ples,
14 If iu savve duim olketa samting hia, mi bae agree*Dat iu savve sevem iuseleva witim own paoa blo iu.
15 Lukim disfala Behemoth,* wea mi mekem olsem mi mekem iu.
Hem kaikaim grass olsem buluka.
16 Lukim strong lo hips blo hemAnd paoa lo olketa masol lo bele blo hem!
17 Tail blo hem strong olsem cedar tree.And olketa sinew lo thighs blo hem olsem samting wea olketa weavim tugeta.
18 Hem olsem olketa mekem bon blo hem from copper.Olketa leg blo hem olsem iron.
19 Lo kaen animal olsem, hem nao first and paoaful animal* lo evri samting wea God wakem.Only Man wea Wakem hem nomoa savve go klosap lo hem witim sword blo hem.
20 Olketa maunten wea hem ples wea olketa wild animal plei,Producem kaikai for hem.
21 Hem leidaon andanit olketa lotus tree,Hem haed between olketa reed grass insaed lo swamp.
22 Olketa lotus tree provaedem shade for hem,And olketa poplar tree wea stap lo valley* stap raonem hem.
23 Nomata river hem ran big, hem nating panic.
Hem nating fraet nomata Jordan River ran strong and bangam mouth blo hem.
24 Hao, eniwan savve kasholem hem taem hem gohed lukluk,Or hukim nose blo hem witim wanfala huk?*
Olketa footnote
^ Or, “justice blo mi no stret.”
^ Heb., “feis blo olketa.”
^ Or, “praisem iu.”
^ Maet diswan hem hippopotamus.
^ Heb., “hem nao start.”
^ Or, “wadi.” Lukim “Wadi” lo Dictionary.
^ Heb., “trap.”
