Judges 10:1-18
10 Bihaen lo taem blo Abimelech, Tola wea hem son blo Puah wanfala man lo tribe blo Issachar hem kamap judge lo Israel, Puah hem son blo Dodo. Tola stap lo Shamir lo olketa area lo olketa maunten lo Ephraim.
2 Hem judge lo Israel for 23 years, then hem dae and olketa berem hem lo Shamir.
3 Bihaen lo hem, Jair wea hem man lo Gilead, hem judge lo Israel for 22 years.
4 Hem garem 30-fala son, wea raedem 30-fala donkey, and olketa garem 30-fala taon, wea stap lo land lo Gilead. Olketa kolem olketa taon hia lo Havvoth-jair kam kasem distaem.
5 Bihaen datwan, Jair hem dae and olketa berem hem lo Kamon.
6 Then olketa Israelite duim moa olketa nogud samting lo eye blo Jehovah, and olketa start for worshipim olketa Baal, olketa idol blo Ashtoreth, olketa god blo Aram,* olketa god blo Sidon, olketa god blo Moab, olketa god blo olketa Ammonite, and olketa god blo olketa Philistine. Olketa lusim Jehovah and stop for worshipim hem.
7 Then kros blo Jehovah kam againstim olketa Israelite, and hem givim* olketa lo hand blo olketa Philistine, and lo olketa Ammonite.
8 So olketa barava spoelem and treatim nogud olketa Israelite lo datfala year. For 18 years olketa gohed treatim nogud evri Israelite wea stap lo Gilead, lo east saed blo Jordan River wea hem land blo olketa Amorite bifor.
9 Olketa Ammonite tu savve akrosim Jordan River for go faet againstim tribe blo Judah, tribe blo Benjamin, and olketa lo laen* blo Ephraim. And datwan mekem olketa Israelite safa tumas.
10 Then olketa Israelite singaot lo Jehovah for helpem olketa, and sei: “Mifala sin againstim iu nao, bikos mifala lusim iu, God blo mifala, and worshipim olketa Baal.”
11 Bat Jehovah sei lo olketa Israelite: “Waswe, ino mi nao sevem iufala from olketa lo Egypt and from olketa Amorite, olketa Ammonite, olketa Philistine,
12 olketa Sidonian, olketa Amalekite, and olketa Midianite taem olketa spoelem iufala? Taem iufala krae kam lo mi, mi nao sevem iufala from hand blo olketa.
13 Bat iufala lusim mi and worshipim olketa nara god. So bae mi no sevem iufala moa.
14 Go lo olketa god wea iufala chusim and singaot lo olketa for helpem iufala. Letem olketa nao sevem iufala from olketa trabol wea kasem iufala.”
15 Bat olketa Israelite sei lo Jehovah: “Mifala sin nao. Duim lo mifala wanem hem stret lo eye blo iu. Bat plis, iu sevem mifala distaem.”
16 And olketa aotem olketa god blo olketa nara nation wea stap midolwan olketa, and olketa worshipim Jehovah, datwan mekem hem for sorre lo olketa Israelite and no letem olketa for gohed safa.
17 Gogo, olketa Ammonite kam tugeta and putim camp blo olketa lo Gilead. So olketa Israelite kam tugeta and putim camp blo olketa lo Mizpah.
18 Olketa pipol and olketa leader blo Gilead sei olsem lo each other: “Hu nao bae leadim iumi for faet againstim olketa Ammonite? Hem nao bae kamap leader ovarem evri pipol wea stap lo Gilead.”
