Judges 17:1-13
-
Olketa idol and priest blo Micah (1-13)
17 Wanfala man stap lo olketa area lo olketa maunten lo Ephraim, wea nem blo hem Micah.
2 Hem sei lo mami blo hem: “Mi herem iu talem dat, trabol bae kasem man wea stealim 1,100 silver shekel* blo iu. Lukim! Olketa silver shekel ia lo hia, mi nao mi tekem.” So mami blo hem sei: “Jehovah nao bae blessim iu, son blo mi.”
3 So hem givim bak 1,100 silver shekel lo mami blo hem, bat mami blo hem sei: “Bae mi mas givim* olketa silver shekel ia go lo Jehovah, mekem son blo mi savve iusim for wakem wanfala idol and wanfala statue.* So mi givim bak lo iu silver shekel hia.”
4 Bihaen hem givim bak olketa silver shekel hia lo mami blo hem, mami blo hem tekem 200 silver shekel and givim lo man for wakem olketa samting from silver. Man hia wakem wanfala idol and wanfala statue,* and putim olketa samting hia lo haos blo Micah.
5 Disfala man Micah, hem garem wanfala haos blo olketa idol, and hem mekem wanfala ephod* and olketa teraphim statue* and markem* wanfala lo olketa son blo hem for hem nao priest for hem.
6 Lo datfala taem, Israel no garem eni king. So each wan gohed duim nomoa samting wea stret lo eye blo hem.*
7 Lo taem ia wanfala young man from famili blo Judah, hem stap lo Bethlehem lo Judah. Hem wanfala Levite, and hem stap lo there for samfala taem finis.
8 Man hia lusim taon blo Bethlehem lo Judah for go lukaotem ples for stap. Lo gogo blo hem, hem kam lo olketa area lo olketa maunten lo Ephraim, and kasem nao haos blo Micah.
9 Then Micah sei lo hem: “Iu kam from wea ia?” Hem sei: “Mi wanfala Levite from Bethlehem lo Judah, and mi go for lukaotem ples for mi stap lo hem.”
10 So Micah sei lo hem: “Kam stap witim mi and kamap dadi* and priest for mi. Bae mi givim iu tenfala silver shekel insaed wan year, and olketa kaleko wea iu needim and kaikai for iu.” So datfala Levite go insaed.
11 Young Levite hia agree for stap witim Micah, and hem kamap nao olsem wanfala lo olketa son blo Micah.
12 And tu, Micah markem* datfala Levite for kamap priest for hem, and hem stap lo haos blo Micah.
13 Then Micah sei: “Mi savve nao ia, bae Jehovah duim gud samting for mi, bikos datfala Levite hem kamap priest blo mi.”
Olketa footnote
^ Wanfala shekel equals 11.4 g. Lukim App. B14.
^ Or, “mekem holy.”
^ Or, “meltim metal for kamap statue.”
^ Or, “meltim metal for kamap statue.”
^ Lukim “Ephod” lo Dictionary.
^ Or, “olketa god blo famili, olketa idol.” Lukim “Teraphim” lo Dictionary.
^ Heb., “fulimap hand blo.”
^ Or, “samting wea hem tingse hem stret.”
^ Or, “wanfala advaesa.”
^ Heb., “fulimap hand blo.”
