Leviticus 20:1-27
20 Jehovah sei moa lo Moses:
2 “Iu mas tok olsem lo olketa Israelite, ‘Eni man blo Israel or eni foreigner wea stap witim olketa Israelite wea givim pikinini blo hem for Molech,* iufala mas killim hem dae. Pipol lo ples wea hem stap mas sutim hem dae lo ston.
3 Mi bae rejectim* datfala man, and mi bae killim hem dae bikos hem givim samfala pikinini blo hem lo Molech and hem mekem holy ples blo mi for no klin and spoelem holy nem blo mi.
4 Sapos pipol lo land hia lukim samting wea man hia duim taem hem givim pikinini blo hem lo Molech, bat olketa no killim dae man hia,
5 then mi bae rejectim* datfala man and famili blo hem. Mi bae killim dae datfala man witim evriwan wea joinim hem for worshipim* Molech.
6 “‘Eni man* wea go lo samwan wea savve story witim olketa demon for askem help blo hem and askem samwan wea duim spiritism for talem samting wea bae happen lo future, hem no faithful lo mi.* Bae mi againstim man* hia and bae mi killim hem dae.
7 “‘Iufala mas klin and kamap holy bikos mi Jehovah, God blo iufala.
8 And iufala mas obeyim olketa law blo mi and followim olketa. Mi Jehovah, wea mekem iufala holy.
9 “‘Sapos eni man tok nogud lo dadi or mami blo hem, iufala mas killim hem dae. From hem tok nogud lo dadi or mami blo hem, hemseleva kasem blame for dae blo hem.*
10 “‘Diswan nao panisment for eni man wea duim adultery witim waef blo nara man: Man wea duim adultery witim waef blo nara man iufala mas killim hem dae. Iufala mas killim tufala* evriwan dae.
11 Man wea duim sex witim waef blo dadi blo hem, hem mek shame lo dadi blo hem.* Iufala mas killim tufala dae. Tufala kasem blame for dae blo tufala seleva.*
12 Sapos wanfala man duim sex witim dota-in-law blo hem, iufala mas killim tufala dae. Tufala againstim arrangement blo God. Tufala kasem blame for dae blo tufala seleva.*
13 “‘Sapos wanfala man duim sex witim nara man,* tufala duim samting wea mi barava heitim. Iufala mas killim tufala dae. Tufala kasem blame for dae blo tufala seleva.*
14 “‘Sapos wanfala man duim sex witim wanfala woman and mami blo woman hia, datwan hem barava shameful* samting. Iufala mas killim dae datfala man and tufala woman hia and bonem olketa insaed fire mekem datkaen wei no gohed midolwan lo iufala.
15 “‘Sapos eni man duim sex witim eni animal, iufala mas killim hem dae, and iufala mas killim dae datfala animal.
16 Sapos eni woman trae for duim sex witim eni animal, iufala mas killim dae datfala woman and datfala animal. Iufala mas killim tufala dae. Datfala man and woman hia kasem blame for dae blo tufala seleva.*
17 “‘Sapos wanfala man tekem sista blo hem, wea hem dota blo dadi blo hem or dota blo mami blo hem, and hem duim sex witim woman hia, datwan hem shameful samting. Iufala mas killim tufala dae front lo eye blo pipol blo tufala. Datfala man mek shame lo sista blo hem.* Hem mas kasem panis for sin wea hem duim.
18 “‘Sapos wanfala man leidaon witim woman wea hem period and hem duim sex witim woman hia, tufala nating respectim dat blood hem holy. Iufala mas killim dae tufala.
19 “‘Iu mas no duim sex witim sista blo mami blo iu or sista blo dadi blo iu bikos datwan bae mek shame lo relative blo iu wea iutufala sem blood. Iutufala mas kasem panis for sin wea iutufala duim.
20 Eni man wea duim sex witim waef blo uncle blo hem, datfala man mek shame lo uncle blo hem.* Tufala mas kasem panis for sin wea tufala duim. Tufala mas dae. Tufala bae no garem pikinini.
21 Sapos wanfala man tekem waef blo brata blo hem, datwan hem barava nogud samting. Hem mek shame lo brata blo hem.* Tufala bae dae. Tufala bae no garem pikinini.
22 “‘Iufala mas obeyim evri law and evri judicial disison* blo mi and followim olketa mekem iufala no aot from datfala land wea mi bae leadim iufala for go stap lo hem.
23 Iufala mas no followim olketa nogud wei blo olketa nation wea mi raosem olketa bikos olketa duim evri samting hia and mi barava heitim olketa.
24 Dastawe mi sei lo iufala: “Iufala bae tekova lo land blo olketa, and bae mi givim datfala land lo iufala for onam, land hia garem staka milk and honey. Mi Jehovah, God blo iufala, wea mekem iufala difren from evri nara nation.”
25 Iufala mas luksavve lo difference between animal wea klin* and animal wea no klin* and difference between bird wea no klin and bird wea klin. Iufala mas no mekem iufala seleva* no klin bikos lo eni animal or bird, or eniting wea krol lo graon wea mi talem dat hem no klin.
26 Iufala mas holy front lo mi bikos mi, Jehovah, mi holy, and mi mekem iufala difren from evri nara pipol mekem iufala kamap pipol blo mi.
27 “‘Eni man or woman wea savve story witim olketa demon or hem duim spiritism for talem samting wea bae happen lo future, iufala mas killim hem dae. Iufala mas sutim hem dae lo ston. Hem kasem blame for dae blo hemseleva.’”*
Olketa footnote
^ Lukim “Molech” lo Dictionary.
^ Heb., “mekem feis blo mi for againstim.”
^ Heb., “mekem feis blo mi for againstim.”
^ Heb., “durong witim.”
^ Or, “soul.”
^ Or, “durong lo spiritual wei.”
^ Or, “soul.”
^ Or, “blood blo hem lo hand blo hemseleva.”
^ Heb., “man wea duim adultery and woman wea duim adultery.”
^ Heb., “hem showim private part blo dadi blo hem.”
^ Or, “Blood blo tufala lo hand blo tufala seleva.”
^ Or, “Blood blo tufala lo hand blo tufala seleva.”
^ Heb., “leidaon witim nara man lo sem wei wea hem leidaon witim wanfala woman.”
^ Or, “Blood blo tufala lo hand blo tufala seleva.”
^ Or, “dirty.”
^ Or, “Blood blo tufala lo hand blo tufala seleva.”
^ Heb., “showim private part blo sista blo hem.”
^ Heb., “showim private part blo uncle blo hem.”
^ Heb., “showim private part blo brata blo hem.”
^ Lukim “Judicial Disison” lo Dictionary.
^ Maet diswan hem olketa animal wea olketa fit for sakrifaesim lo God.
^ Lukim “No Klin” lo Dictionary.
^ Or, “olketa soul blo iufala.”
^ Or, “Blood blo hem lo hand blo hemseleva.”
