Nahum 3:1-19
3 Sorre tumas lo taon wea killim dae* staka pipol!
Hem fulap witim wei for laea and steal.
No enitaem hem short for tekem kaikai blo hem!
2 Man savve herem saond blo whip and noes blo olketa wheel,Horse wea ran speed and chariot wea mek noes go pas.
3 Man wea raedem horse, sword wea shaen, and spia wea shaen braet,Staka pipol olketa killim dae, and staka hip blo olketa dead bodyOlketa dead body hia staka tumas, and man no savve kaontem nao.
Pipol gohed foldaon antap lo olketa dead body.
4 Diswan hem bikos lo staka rabis samting wea prostitute ia duim,Wei blo hem for switim pipol and mekem olketa laekem hem, hem woman wea savve tumas for duim magic,Hem iusim wei blo hem for prostitute for trapim olketa nation, and iusim magic blo hem for trapim olketa famili.
5 “Lukim! Mi againstim iu,”* hem nao wanem Jehovah, komanda blo olketa army hem talem:“Mi bae apim skirt blo iu ovam feis blo iu,Mi bae mekem olketa nation for lukim iu naked,And olketa kingdom for lukim wei wea iu shame.
6 And bae mi torowem barava rabis samting lo iuAnd barava mek shame lo iu.Bae mi mekem iu luk karangge front lo pipol.
7 Evriwan wea lukim iu bae ranawe from iu and sei,‘Nineveh hem distroe finis!
Hu nao bae sorre lo hem?’
Wea nao bae mi faendem pipol for comfortim iu?
8 Hao, iu gud winim No-amon,* wea stap klosap lo olketa canal lo Nile?
Wata stap raonem hem,Olketa riches blo hem kam from sea, and sea nao wall blo hem.
9 Ethiopia hem main ples for givim strong lo hem, and Egypt tu.
Put and olketa lo Libya nao pipol for helpem hem.*
10 Bat hem tu go stap lo nara ples,Olketa tekem hem for prisoner.
Olketa pikinini blo hem tu olketa kill nogud lo olketa lo evri kona lo street.*
Olketa iusim olketa smol ston* for chusim olketa important man blo hem,And evri bigman blo hem olketa chainim olketa.
11 And iu tu bae iu drunk.Iu bae go and iu haed.
Iu bae lukaotem ples for stap sef from enemy.
12 Evri strong wall blo iu hem olsem olketa fig tree wea garem olketa first frut wea raep.Sapos olketa sekem, bae olketa foldaon insaed mouth blo olketa wea bae finisim olketa.
13 Lukim! Olketa soldia blo iu olketa olsem olketa woman midolwan lo iu.
Olketa gate lo land blo iu bae open big for olketa enemy blo iu.
Fire bae bonem olketa bar lo olketa gate blo iu.
14 Tekem wata redi for taem wea olketa bae attak!
Strongim gud olketa strong wall blo iu.
Go daon lo mud and stepim clay,Redyim mold for wakem brik.
15 Nomata olsem, fire bae distroem iu.
Wanfala sword bae daonem iu.
Hem bae finisim iu olsem wanem olketa young locust* savve duim.
Iu mekem iuseleva staka olsem olketa young locust!
Tru nao, mekem iuseleva for staka olsem olketa locust!
16 Iu mekem olketa bisnisman blo iu for staka winim olketa star lo skae.
Young locust aotem skin blo hem and flae go.
17 Olketa wea gaedem iu olketa olsem locust,And olketa officer blo iu olketa olsem big grup blo locust.
Olketa camp insaed olketa hol lo ston lo day wea hem cold,Bat taem sun hem shaen, olketa flae go nao,And no eniwan savve wea nao olketa go lo hem.
18 O king blo Assyria, olketa shepherd blo iu olketa laek sleep tumas.Olketa prince blo iu stap nomoa lo haos blo olketa.
Olketa pipol blo iu go stap evriwea lo olketa maunten,And no eniwan hipimap olketa tugeta.
19 No eniwan bae helpem iu taem trabol kasem iu.
Garekil blo iu bae no savve heal moa.
Evriwan wea herem samting wea kasem iu bae klapem hand blo olketa.Bikos hu nao no safa lo evri nogud wei blo iu?”
Olketa footnote
^ Or, “kapsaetem blood blo.”
^ Diswan hem Nineveh.
^ Diswan hem Thebes.
^ Heb., “iu.”
^ Heb., “lo hed blo evri street.”
^ Lo English hem sei “lots.” Lukim “Lots” lo Dictionary.
^ Or, “olsem locust wea krol, no garem wing yet.” Hem wanfala type insect wea olsem grashopa.