Nehemiah 1:1-11
1 Diswan nao hem toktok blo Nehemiah,* son blo Hacaliah: Lo month blo Chislev,* lo mek-20 year, mi lo palace* wea stap lo Shushan.*
2 Lo datfala taem, Hanani, wanfala lo olketa brata blo mi, hem arrive kam from Judah witim olketa nara man, and mi askem olketa abaotem olketa Jew wea prisoner bifor wea go bak, and abaotem Jerusalem tu.
3 Olketa sei: “Olketa wea prisoner bifor and go bak lo datfala province olketa insaed nogud situation and datwan hem shameful samting. Olketa wall lo Jerusalem nogud and fire bonem olketa gate blo hem.”
4 Taem mi herem wanem olketa talem, mi sidaon and start for krae and sorre for staka day, and mi gohed fasting and prea lo God wea rul lo heven.
5 Mi sei: “O Jehovah, God wea rul lo heven, iu God wea duim olketa nambawan samting and olketa man fit for fraet lo iu. And iu keepim covenant blo iu and showim loyal love* lo olketa wea lovem iu and obeyim olketa komandment blo iu.
6 Plis, iu herehere kam. Iu lukluk kam lo mi and herem prea blo servant blo iu wea mi talem lo iu tuday. Mi prea lo iu day and naet abaotem olketa servant blo iu, olketa Israelite. Mi confessim olketa sin wea pipol lo Israel duim againstim iu. Mifala sin nao, mi and evriwan lo famili laen blo dadi blo mi.
7 Mifala duim rong samting againstim iu taem mifala no obeyim olketa komandment, law, and judicial disison* wea iu givim lo servant blo iu, Moses.
8 “Plis, tingim disfala toktok wea iu komandim* lo servant blo iu, Moses: ‘Sapos iufala no faithful, mi bae mekem iufala stap evriwea midolwan lo olketa nation.
9 Bat sapos iufala kam bak lo mi and obeyim olketa komandment blo mi, nomata iufala stap lo olketa farawe ples lo earth, mi bae tekem iufala kam bak from there and putim iufala lo ples wea mi chusim for nem blo mi stap lo hem.’
10 Olketa hia olketa servant blo iu and pipol blo iu, wea iu iusim bigfala paoa and strongfala hand blo iu for sevem* olketa.
11 O Jehovah, plis herem prea blo servant blo iu and prea blo olketa servant blo iu wea barava respectim* nem blo iu, and plis, helpem servant blo iu tuday mekem king hem sorre lo mi.”
Mi nao man for lukaftarem wine blo king.
Olketa footnote
^ Mining blo hem “Jah Comfortim.”
^ Lukim App. B15.
^ Or, “strongfala ples for haed.”
^ Or, “Susa.”
^ Lukim “Loyal Love” lo Dictionary.
^ Lukim “Judicial Disison” lo Dictionary.
^ Or, “warning wea iu givim.”
^ Heb., “baem bak.” Lukim “Baem Bak” lo Dictionary.
^ Heb., “fraet lo.”
