Nehemiah 8:1-18
8 Then evri pipol wan mind for hipap tugeta lo pablik area front lo Wata Gate, and olketa talem Ezra, datfala man for copyim* olketa holy raeting, for tekem kam buk blo Law blo Moses, wea Jehovah komandim olketa Israelite for followim.
2 Lo first day blo mek-seven month, Ezra, datfala priest, tekem kam Law hia front lo kongregeson blo olketa man, woman, and evriwan wea fit for lisin and minim samting.
3 And hem readim big datwan lo pablik area front lo Wata Gate, start lo early morning go kasem midolday, lo olketa man, woman, and evriwan wea fit for minim samting. And evri pipol hia lisin gud taem hem readim datfala buk blo Law.
4 And Ezra, datfala man for copyim* olketa holy raeting, hem standap antap wanfala wooden stage wea olketa wakem for datfala meeting. And olketa wea standap lo raet saed blo hem, hem Mattithiah, Shema, Anaiah, Uriah, Hilkiah, and Maaseiah. And olketa wea standap lo left saed blo hem, hem Pedaiah, Mishael, Malchijah, Hashum, Hash-baddanah, Zechariah, and Meshullam.
5 Evri pipol lukim taem Ezra openem datfala buk bikos hem standap lo datfala stage. Taem hem openem buk hia, evri pipol standap.
6 Then Ezra praisem Jehovah, datfala tru God, wea hem God wea garem bigfala paoa, and pipol hia sei, “Amen!* Amen!” and olketa liftimap hand blo olketa. Then olketa nildaon front lo Jehovah and baodaon go kasem graon.
7 And Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, and Pelaiah, wea olketa Levite, gohed for explainim mining blo Law hia lo pipol hia taem olketa gohed standap.
8 And olketa gohed for read big from buk blo Law blo datfala tru God, and explainim Law hia and helpem pipol hia for minim datwan. So olketa helpem pipol hia for savve hao for followim wanem olketa herem.
9 And Nehemiah, wea hem governor* lo datfala taem, Ezra, datfala priest and man for copyim* olketa holy raeting, and olketa Levite wea teachim pipol, sei lo evriwan: “Disfala day hem holy lo Jehovah, God blo iufala. Iufala no sorre or krae.” Bikos evri pipol hia krae taem olketa herem olketa toktok blo datfala Law.
10 Hem sei lo olketa: “Iufala go kaikaim olketa best* kaikai and drinkim swit wine, and givim samfala kaikai for olketa wea no garem eni samting bikos disfala day hem holy lo Lord blo iumi, and iufala mas no feel sorre bikos hapi wea Jehovah givim iufala hem mekem iufala strong.”*
11 And olketa Levite gohed sei lo evri pipol hia: “Iufala no krae bikos disfala day hem holy, and iufala mas no feel sorre.”
12 So evri pipol hia go and kaikai and drink and givim kaikai for olketa narawan and olketa hapi tumas bikos olketa minim nao olketa toktok blo datfala Law wea olketa herem.
13 And lo mek-tu day, olketa wea hed lo laen blo dadi blo olketa, olketa priest, and olketa Levite kam lo Ezra, datfala man for copyim* olketa holy raeting bikos olketa laek for minim gud go moa olketa toktok blo datfala Law.
14 Insaed lo datfala Law wea Jehovah komandim thru lo Moses, olketa hia lukim dat olketa Israelite shud stap insaed lo olketa smol leaf haos* lo taem blo festival lo mek-seven month.
15 And olketa shud announcem disfala toktok lo evri taon blo olketa and lo evri ples lo Jerusalem: “Go lo olketa area lo olketa maunten and tekem kam olketa branch blo olive tree wea garem staka leaf, pine tree, myrtle and palm tree, and tekem kam tu branch wea garem staka leaf blo olketa nara tree for mekem lo olketa smol leaf haos followim wanem law hem talem.”
16 So pipol hia go aot and tekem kam olketa samting hia for mekem olketa smol leaf haos blo olketa. Each wan mekem datwan lo ruf blo hem, lo courtyard blo olketa, lo courtyard lo haos blo datfala tru God, lo pablik area front lo Wata Gate, and lo pablik area front lo Gate blo Ephraim.
17 So evriwan* wea kam bak from ples wea olketa prisoner lo hem bifor, mekem olketa smol leaf haos and olketa stap insaed lo taem blo festival. Olketa Israelite hapi tumas bikos start kam lo taem blo Joshua, son blo Nun, diswan nao firstaem wea olketa celebratem disfala festival lo wei olsem.
18 And each day olketa herem reading from datfala buk blo Law blo datfala tru God, start lo first day go kasem last day. And olketa celebratem disfala festival for sevenfala day, and lo mek-eit day olketa celebratem wanfala holy assembly followim wanem Law hem talem.
Olketa footnote
^ Or, “scribe blo.”
^ Or, “scribe blo.”
^ Or, “Hem mas olsem!”
^ Or, “Tirshatha.” Diswan hem title lo Persia for governor blo eni province.
^ Or, “scribe blo.”
^ Heb., “fat.”
^ Heb., “sef ples blo iufala.”
^ Or, “scribe blo.”
^ Or, “olketa temporary haos.”
^ Heb., “kongregeson.”
