Obadiah 1:1-21
1 Vision blo Obadiah:*
Diswan nao wanem Sovereign Lord Jehovah hem talem abaotem Edom:
“Mifala herem wanfala report from Jehovah,Hem sendem wanfala messenger go lo olketa nation, and sei:
‘Getap, iumi redi for faet againstim hem.’”
2 “Lukim! Mi mekem iu for iu no important midolwan olketa nation,Olketa barava heitim iu.
3 Heart blo iu wea praod nao laea lo iu,Iu wea stap haed lo bigfala ston,Wea stap lo ples wea hae, and insaed lo heart blo iu, iu sei,‘Hu nao bae daonem mi kam lo graon?’
4 Nomata sapos iu mekem ples blo iu for stap hem hae* olsem eagle,Or sapos iu putim nest blo iu midolwan olketa star,Mi bae daonem iu kam from there,” hem nao wanem Jehovah talem.
5 “Sapos olketa man for steal kam lo iu, and olketa steal lo naet,(Iu bae barava distroe!)*
Hao, olketa bae stealim nomoa wanem olketa laekem?
Or sapos olketa man for harvestim grape nao kam lo iu,Hao, bae olketa no leavim samfala for olketa narawan kam pikim bihaen?
6 Sorre tumas lo Esau, olketa faendem and tekem evriting blo hem finis!
Evri riches blo hem wea stap haed olketa aftarem finis!
7 Olketa raosem iu go lo border blo olketa.
Evri man wea sapotim iu* olketa laea lo iu.
Olketa man wea stap gud* witim iu, olketa againstim iu and winim iu.
Olketa wea kaikai witim iu bae putim wanfala net andanit lo iu,Bat iu bae nating luksavve lo datwan.
8 Lo datfala day,” diswan nao wanem Jehovah talem,“Bae mi distroem olketa wea wise from EdomAnd olketa wea garem wei for luksavve from olketa area lo olketa maunten blo Esau.
9 And iufala lo Teman, olketa strong man blo iu for faet bae olketa barava fraet,Bikos evriwan wea stap lo olketa area lo olketa maunten blo Esau bae olketa killim dae.
10 Bikos lo nogud samting wea iu bin duim lo brata blo iu Jacob,Bae iu barava shame,And bae iu finis for olowe.
11 Lo datfala day wea iu standap nomoa and lukluk,Lo datfala day wea olketa stranger tekem army blo hem for go prisonerTaem olketa foreigner kam insaed taon* blo hem and iusim olketa smol ston* for tekem Jerusalem,Iu tu duim sem samting olsem olketa.
12 Iu shud no laf lo brata blo iu lo day wea nogud samting kasem hem,Iu shud no hapi lo day wea pipol blo Judah olketa finis,And iu shud no tok praod lo day wea olketa kasem trabol.
13 Iu shud no kam insaed taon* blo pipol blo mi lo day wea olketa kasem trabol,Iu shud no laf lo nogud samting wea kasem hem lo day wea hem kasem trabol,And iu shud no tasim olketa riches blo hem lo day wea hem kasem trabol.
14 Iu shud no standap lo olketa crossroad for killim dae olketa blo hem wea ranawe,And iu shud no givim go lo olketa enemy, eniwan blo hem wea stap laef lo day blo trabol.
15 Bikos day blo Jehovah for againstim evri nation hem klosap nao.
Olketa samting wea iu duim, sem samting tu bae olketa duim lo iu.
Samting wea iu duim lo olketa narawan bae hem kam bak lo iu.*
16 Bikos lo wei wea iufala drunk lo holy maunten blo mi,Evri nation bae gohed nomoa for drink.
Olketa bae drink and swallom go daon,And bae olketa finis olsem olketa nating stap bifor.
17 Bat olketa wea ranawe bae go lo Maunt Zion,And bae hem holy.And olketa lo laen blo Jacob bae onam olketa samting wea hem blo olketa.
18 Olketa lo laen blo Jacob bae kamap olsem wanfala fire,Olketa lo laen blo Joseph bae olsem flame blo fire,And olketa lo laen blo Esau bae olsem drae grass,Bae olketa putim fire lo olketa and finisim olketa,And no eniwan lo laen blo Esau bae stap laef,Bikos Jehovah talem diswan finis.
19 Olketa bae onam Negeb and olketa area lo olketa maunten blo Esau,Blo Shephelah and land blo olketa Philistine.
Olketa bae onam land lo Ephraim and land lo Samaria,And Benjamin bae onam Gilead.
20 Pipol wea stap prisoner lo disfala strong taon,Wea hem pipol blo Israel, bae onam land blo olketa lo Canaan go kasem Zarephath.
And pipol blo Jerusalem wea stap prisoner lo Sepharad, bae onam olketa taon lo Negeb.
21 And olketa wea sevem pipol bae go ap lo Maunt ZionFor judgem olketa area lo olketa maunten blo Esau,And Jehovah bae hem kamap king.”
Olketa footnote
^ Mining blo hem “Servant blo Jehovah.”
^ Or maet, “iu flae hae.”
^ Or maet, “Haomas samting nao bae olketa distroem?”
^ Or, “olketa wea mekem agreement witim iu.”
^ Or, “lo peace.”
^ Heb., “gate.”
^ Lo English hem sei “lots.” Lukim “Lots” lo Dictionary.
^ Heb., “gate.”
^ Heb., “kam bak lo hed blo iu.”