Proverbs 10:1-32
10 Olketa proverb blo Solomon.
Wise son hem mekem dadi blo hem for hapi,Bat karangge son hem mekem mami blo hem for sorre.
2 Olketa treasure wea man kasem bikos lo corruption bae no helpem hem,Bat raeteous fasin nao hem samting wea rescuem man from dae.
3 Jehovah bae no letem raeteous man* for hangere,Bat hem bae no givim samting wea wicked man hem barava laekem.
4 Hand wea lesy bae mekem man for poor,Bat hand wea waka hard mekem man rich.
5 Son wea harvestim kaikai lo summer season hem garem wei for minim samting,Bat son wea deepim sleep lo taem blo harvest hem mek shame lo hemseleva.
6 Olketa blessing stap lo hed blo raeteous man,Bat mouth blo wicked man hem haedem violence.
7 Pipol bae evritaem tingim* raeteous man and hem bae kasem blessing,Bat nem blo wicked man bae rotten.
8 Man wea heart blo hem wise bae acceptim olketa instruction,*Bat man wea talem olketa karangge toktok bae hem safa.
9 Man wea wakabaot followim faithful wei bae wakabaot lo peace,Bat man wea trikim pipol bae hard for haedem wat hem duim.
10 Man wea sat eye for trikim narawan hem kosim sorre,And man wea talem olketa karangge toktok bae hem safa.
11 Mouth blo raeteous man hem source blo laef,Bat mouth blo wicked man hem haedem violence.
12 Wei for heit hem mekem raoa kamap,Bat love hem kavarem evri sin.
13 Wisdom hem stap lo lips blo man wea garem wei for luksavve,Bat stik hem for baksaed blo man wea no garem gud tingting.*
14 Olketa wea wise keepim knowledge olsem treasure,Bat mouth blo man wea karangge hem invaetem trabol.
15 Olketa riches* blo man wea rich hem nao strongfala taon blo hem.
Bat pipol wea poor olketa safa bikos olketa no garem eni samting.
16 Samting wea raeteous man duim leadim hem for laef.Bat samting wea wicked man duim leadim hem for sin.
17 Man wea followim discipline hem leadim olketa narawan lo road for laef,*Bat man wea ignorem kaonsel hem leadim olketa narawan go rong.
18 Man wea haedem feeling for heit hem no tok tru,And man wea spredim laea story for spoelem narawan hem stupid.
19 Taem man hem toktok tumas, hard for hem misstim sin,Bat eniwan wea kontrolem lips blo hem, hem duim wise samting.
20 Tongue blo raeteous man hem olsem best silver,Bat heart blo wicked man hem garem smol value.
21 Lips blo raeteous man hem strongim* staka,Bat man wea karangge hem dae bikos hem no garem gud tingting.
22 Blessing blo Jehovah nao mekem man for rich,And olketa blessing blo Hem no kosim eni pain.*
23 Wei for duim shameful samting hem olsem game for man wea stupid,Bat wisdom hem blo man wea garem wei for luksavve.
24 Samting wea wicked man fraetem bae hem kasem hem.Bat samting wea raeteous man laekem tumas bae hem kasem.
25 Taem strong wind hem go pas, wicked man bae no stap nao,Bat raeteous man hem olsem faondeson wea stap for olowe.
26 Olsem vinegar hem mekem teeth saoa and smoke hem mekem eye saoa,Hem nao hao boss hem feel abaotem man wea lesy.
27 Man wea fraet lo Jehovah bae laef for longtaem,Bat olketa year blo man wea wicked bae no staka.
28 Samting wea raeteous man expectim* mekem hem hapi,Bat hope blo wicked man bae finis.
29 Wei* blo Jehovah hem protectim man wea no garem blame,Bat hem trabol for olketa wea duim wicked samting.
30 No eni samting bae mekem raeteous man for foldaon,Bat olketa wea wicked bae no stap moa lo earth.
31 Toktok blo raeteous man hem fulap lo* wisdom,Bat tongue wea talem olketa nogud samting bae olketa katemaot.
32 Lips blo raeteous man hem savve lo wat nao hem gud,Bat mouth blo wicked man hem nogud.
Olketa footnote
^ Or, “soul blo raeteous man.”
^ Or, “no forgetim gud nem blo.”
^ Heb., “komandment.”
^ Heb., “hem garem heart wea karangge.”
^ Or, “best samting.”
^ Or maet, “followim road for laef.”
^ Or, “leadim.”
^ Or, “sorre; hard samting.”
^ Or, “hope lo hem.”
^ Or, “Olketa standard.”
^ Or, “garem frut blo.”
