Proverbs 16:1-33
16 Man ting raonem wat hem shud talem,*Bat ansa wea hem talem* hem from Jehovah.
2 Man tingse evri samting wea hem duim hem stret,*Bat Jehovah lukluk gud lo motive* blo hem.
3 Depend lo Jehovah lo evri samting wea iu duim,*And olketa plan blo iu bae succeed.
4 Jehovah iusim evri samting mekem will blo hem kamap tru,And hem bae mek sure wicked pipol bae finis.
5 Jehovah barava heitim eniwan wea praod lo heart.
Iu savve,* man hia bae no misstim panis.
6 Loyal love* and wei for faithful savve kavarem sin,And wei for fraet lo Jehovah hem mekem man tane difren from nogud wei.
7 Taem Jehovah hem hapi lo olketa samting wea man duim lo laef blo hem,Hem mekem olketa enemy blo man hia tu for stap gud witim hem.
8 Hem beta for garem tu-thri samting and duim raeteous samtingWinim for kasem big income and no showim justice.
9 Man savve planim wat hem laek for duim lo laef blo hem,Bat Jehovah nao directim olketa step blo hem.
10 Disison wea kam from God shud stap lo lips blo wanfala king.Hem mas evritaem showim justice.
11 Honest scale hem from Jehovah.Hem nao markem evri standard blo ston weight insaed lo bag.
12 Olketa king shud heitim wicked wei,Bikos rul blo olketa bae strong sapos olketa followim justice.
13 Olketa king hapi lo raeteous toktok.
Olketa laekem tumas man wea talem tru samting.
14 Kros blo king hem olsem wanfala messenger blo dae,Bat wise man hem daonem* kros hia.
15 Lo laet blo feis blo king, laef hem stap.Taem hem hapi lo samwan, hem olsem cloud blo rain lo spring season.
16 Hem beta for waka hard for kasem wisdom winim for kasem gold!
For chus for kasem wei for minim samting winim for kasem silver.
17 Olketa wea duim stret samting avoidim road blo nogud fasin.
Eniwan wea lukluk gud lo wei blo hem, hem sevem laef* blo hem.
18 Wei for praod bae mekem man kasem trabol,And praod tingting bae mekem man foldaon.
19 Hem beta for hambol* and stap witim hambol pipolWinim for sharem riches* witim praod pipol.
20 Man wea traem best for minim gud wanfala samting bae succeed,*And man wea trustim Jehovah bae hapi.
21 Man wea hem wise lo heart olketa bae kolem hem lo man wea garem wei for minim samting,And man wea toktok blo hem kaen* savve convincim narawan.
22 Wei for minim samting hem springwata blo laef for olketa wea showim datwan,Bat olketa wea karangge bae kasem discipline from karangge fasin blo olketa seleva.
23 Wise man hem chusim gud olketa toktok blo hemAnd olketa toktok blo hem savve convincim narawan.
24 Naesfala toktok hem olsem honey,Hem swit lo soul* and hem healim olketa bon.
25 Wanfala road hem stap wea man tingse hem stret,Bat endap road hia lead go lo dae.
26 Feeling for laek kaikai* hem mekem man for waka hardBikos hangere* nao mekem hem for no givap.
27 Wanfala iusles man hem go digim moa samting wea nogud.Toktok blo hem olsem fire wea gohed bone.
28 Trabolmaker* savve kosim raoa for kamap,And man for spredim laea story for spoelem nem blo narawan hem separatem olketa klos fren.
29 Man wea raf hem switim narawanAnd leadim hem followim rong road.
30 Hem sat eye taem hem mekem nogud plan.
Hem baetem lips blo hem taem hem duim nogud samting.
31 Gray hair hem kraon wea luk naes*Taem hem stap lo samwan wea wakabaot followim stret road.
32 Man wea slow for kros hem beta winim strong man,And man wea kontrolem kros* blo hem, hem beta winim man wea tekovarem wanfala taon.
33 Pipol savve iusim olketa smol ston* for faendaot lo wanfala samting,Bat evri disison from datwan hem kam from Jehovah.
Olketa footnote
^ Or, “redyim olketa tingting lo heart blo hem.”
^ Or, “stret ansa.” Heb., “ansa blo tongue.”
^ Heb., “pure.”
^ Heb., “spirit.”
^ Or, “Rolim olketa samting wea iu duim lo hand blo Jehovah.”
^ Heb., “Hand joinim hand.”
^ Lukim “Loyal Love” lo Dictionary.
^ Or, “avoidim.”
^ Or, “soul.”
^ Heb., “garem spirit wea low.”
^ Or, “sharem gud samting wea olketa tekem kam bak from faet.”
^ Heb., “faendem gud samting.”
^ Or, “here naes.” Heb., “man wea lips blo hem swit.”
^ Or, “taem man teistim.” Lukim “Soul” lo Dictionary.
^ Or, “Soul.”
^ Heb., “mouth blo hem.”
^ Or, “Man for planim nogud samting.”
^ Or, “blo glory.”
^ Heb., “rul ovarem spirit.”
^ Lo English hem sei “lots.” Lukim “Lots” lo Dictionary.
