Proverbs 6:1-35
6 Son blo mi, sapos iu putim security for loan blo narawan,Sapos iu sekhand for mekem agreement* witim eni stranger,
2 Sapos datfala promis hem kamap trap for iu,And toktok wea iu talem hem olsem wanfala trap,
3 Son blo mi, iu lo hand blo narawan nao.So duim diswan for iu free:
Iu hambol and go kwiktaem for begim hem.
4 No letem tufala eye blo iu for sleep,And tufala eyelid blo iu for klos.
5 Mekem iuseleva free olsem gazelle wea ranawe from man for hunting,Olsem bird wea flae from man for trapim bird.
6 Go lukluk lo olketa ants, iu man wea lesy.Lukluk followim wat olketa duim and kamap wise.
7 Nomata olketa no garem eni komanda, officer, or eni ruler,
8 Olketa redyim kaikai blo olketa lo summer season,And olketa hipimap kaikai blo olketa lo taem blo harvest.
9 Hao long nao iu man wea lesy bae gohed leidaon?
Wat taem nao iu bae wekap?
10 Lelebet sleep, lelebet satem eye,Lelebet foldim tufala hand for rest,
11 And seknomoa iu bae poor nao olsem taem thief seknomoa attakim iu,And hem bae olsem taem soldia tekem evri samting wea iu onam.
12 Man wea iusles and wicked hem raraon for talem olketa laea toktok.
13 Hem sat eye, hem give saen lo foot blo hem, and hem akson witim olketa finger blo hem.
14 From hem garem nogud heart,Hem evritaem mekem olketa rabis plan and kosim raoa.
15 Dastawe, trabol bae seknomoa kasem hem.Kwiktaem nomoa hem bae nogud nao and hard for hem gud bak.
16 Sixfala samting nao Jehovah hem heitim.Yes, sevenfala samting nao hem* barava heitim:
17 Eye wea praod, tongue wea laea, and hand wea killim dae* innocent man,
18 Heart wea mekem olketa wicked plan, and tufala foot wea ran kwiktaem for duim wicked samting,
19 False witness wea evriting hem talem hem laea,And eniwan wea kosim raoa midolwan olketa brata.
20 Son blo mi, obeyim komandment blo dadi blo iu,And no rejectim instruction* blo mami blo iu.
21 Evritaem taengem olketa raonem heart blo iu.Taengem olketa raonem nek blo iu.
22 Taem iu wakabaot, hem bae leadim iu.Taem iu leidaon, hem bae standap gaedem iu.And taem iu wekap, hem bae story lo iu.*
23 Bikos komandment hem wanfala lamp,And law hem wanfala laet,And olketa kaonsel wea stretem man hem road blo laef.
24 Olketa bae gaedem iu from nogud woman,From swit toktok blo olobaot* woman,
25 No letem heart blo iu for laekem hem bikos hem luk naesAnd no letem eye blo hem wea luk naes for switim iu,
26 Bikos prostitute savve mekem man poor gogo wanfala bred nomoa hem savve baem,Bat waef blo nara man savve mekem iu lusim laef* blo iu.
27 Hao, man savve putim fire lo chest blo hem and kaleko blo hem no bone?
28 Or hao, man savve wakabaot antap olketa hot chakol and tufala foot blo hem no bone?
29 Diswan hem semsem tu witim eniwan wea duim sex witim waef blo nara man.Eniwan wea tasim woman hia bae no misstim panis.
30 Pipol no heitim thiefSapos hem steal bikos hem hangere.
31 Bat taem olketa faendaot, hem bae peim bak seven taems lo wat hem stealim.Hem bae givim evri best samting lo haos blo hem.
32 Eniwan wea duim adultery witim eni woman hem no garem gud tingting.*Eniwan wea duim datwan hem kos trabol for hemseleva.*
33 Hem bae kasem trabol and pipol bae no respectim hem,And shame wea kasem hem bae stap for olowe.
34 Bikos wei for jealous bae mekem hasband kros fogud.Hem bae nating sorre taem hem pei bak.
35 Hem bae no acceptim eni compensation.*Mind blo hem bae nating gud, nomata hao big nao present wea iu givim.
Olketa footnote
^ Diswan hem wanfala promis.
^ Or, “soul blo hem.”
^ Heb., “kapsaetem blood blo.”
^ Or, “law.”
^ Or, “teachim iu.”
^ Or, “soul.”
^ Heb., “hem garem heart wea karangge.”
^ Or, “soul blo hem.”
^ Or, “ransom.”
