Proverbs 7:1-27
7 Son blo mi, obeyim olketa toktok blo mi,And keepim olketa komandment blo mi olsem treasure.
2 Obeyim olketa komandment blo mi and gohed laef.Protectim instruction* blo mi olsem pupil lo eye blo iu.
3 Taengem olketa raonem finger blo iu.Raetem olketa lo tablet blo heart blo iu.
4 Sei lo wisdom, “Iu sista blo mi,”
And sei lo wei for minim samting, “Iu relative blo mi,”
5 For protectim iu from nogud* woman,From olobaot* woman and olketa swit toktok blo hem.
6 From window lo haos blo mi,Mi luk kam daon thru lo lattice window blo mi,
7 And taem mi lukluk lo olketa wea no garem experience,Mi luksavve wanfala lo olketa young man hem no garem gud tingting.*
8 Hem go followim street klosap lo ples wea woman hia stap,And hem wakabaot go for haos blo woman hia
9 Bihaen sun go daon bat bifor hem dark, lo evening,Taem hem start for naet and dark.
10 Then mi lukim datfala woman kam meetim hem,Hem werem kaleko olsem* prostitute, and hem garem heart wea savve trikim man tumas.
11 Hem woman for toktok tumas and hem bighed.
Hem* no savve stap kwaet lo haos blo hem.
12 Wan minute hem stap aotsaed, then next minute nomoa hem lo olketa pablik area lo taon,Hem weit lo evri kona.
13 Hem grabim young man hia and kissim hem.Hem nating shame for tok olsem lo hem:
14 “Mi offerim finis olketa peace offering.*
Tuday mi duim wanem mi promisim.
15 Dastawe mi kamaot for meetim iu,Mi lukaotem iu, and mi faendem iu nao!
16 Mi decoratem bed blo mi witim olketa naes kava,Kalakala linen from Egypt.
17 Mi putim myrrh,* aloe, and cinnamon lo bed blo mi.
18 Kam, iumi tufala drink from kap blo love go kasem morning.Iumi tufala enjoyim sex tugeta.
19 Bikos hasband blo mi no stap lo haos.Hem go lo wanfala farawe ples.
20 Hem tekem wanfala basket selen witim hem,And hem bae no kam bak go kasem day blo full moon.”
21 Woman hia talem olketa toktok for tanem tingting blo hem go difren.
Hem negom hem witim olketa swit toktok.
22 Semtaem nomoa man hia go followim hem, olsem wanfala bull wea olketa leadim go for busarem,Olsem wanfala karangge man wea olketa putim hem lo stock* for panisim hem.
23 Hem bae dae taem wanfala arrow go thru lo liver blo hem.Olsem wanfala bird wea pas lo trap, man hia nating savve dat datwan bae offem laef* blo hem.
24 So son blo mi, lisin lo mi.Herem gud olketa toktok wea mi talem.
25 No letem heart blo iu followim olketa wei blo hem.
No followim olketa road blo hem,
26 Bikos hem kosim staka for dae,And olketa wea hem killim dae olketa staka fogud.
27 Haos blo hem lead go lo Grev.*Hem go daon lo olketa dark rum blo dae.
Olketa footnote
^ Or, “law.”
^ Heb., “hem garem heart wea karangge.”
^ Or, “kaleko blo.”
^ Heb., “Tufala foot blo hem.”
^ Or, “communion sakrifaes.” Lukim “Peace Offering” lo Dictionary.
^ Lukim “Myrrh” lo Dictionary.
^ Or, “chain.” Lukim “Stock” lo Dictionary.
^ Or, “soul.”
^ Or, “Sheol.” Diswan hem grev blo olketa man. Lukim “Grev” lo Dictionary.
