Proverbs 9:1-18
9 Tru wisdom hem buildim haos blo hem.Hem katem finis* sevenfala post blo hem.
2 Hem redyim gud meat blo hem.*Hem mixim finis wine blo hem.Hem putim finis evriting antap lo tebol blo hem tu.
3 Hem sendem go olketa woman servant blo hemGo antap olketa hill lo taon for singaot olsem:
4 “Eniwan wea no garem experience, hem mas kam insaed lo hia.”
Hem sei olsem lo man wea no garem gud tingting:*
5 “Kam, kaikaim bred blo miAnd iumi drinkim wine wea mi mixim finis.
6 Lusim wei blo iu for no garem experience* mekem iu laef.Wakabaot stret followim road blo wei for minim samting.”
7 Man wea stretem man for tok spoelem narawan bae kasem shame,And man wea kaonselem samwan wea wicked bae kasem pain.
8 No kaonselem samwan wea savve tok spoelem narawan nogud hem heitim iu.
Kaonselem samwan wea wise and hem bae lovem iu.
9 Givim instruction lo samwan wea wise, and hem bae wise go moa.
Teachim samwan wea raeteous, and hem bae savve lo staka samting go moa.
10 Wei for fraet lo Jehovah hem start blo wisdom,And knowledge abaotem datfala Holy God hem mekem man garem wei for minim samting.
11 Bikos lo mi olketa day blo iu bae staka,And iu bae garem staka year moa lo laef blo iu.
12 Sapos iu kamap wise, wei for wise hia bae mekem iu for kasem gud samting,Bat sapos iu man for tok spoelem narawan, iuseleva bae kasem ansa blo datwan.
13 Wanfala stupid woman hem toktok tumas.
Hem no iusim hed blo hem and hem nating savve lo eniting.
14 Hem sidaon lo entrance lo haos blo hemLo wanfala chair lo olketa hill lo taon,
15 Hem singaot olsem go lo olketa wea go pasOlketa wea wakabaot stret followim road blo olketa:
16 “Eniwan wea no garem experience, hem mas kam insaed lo hia.”
Hem sei olsem lo man wea no garem gud tingting:*
17 “Wata wea olketa stealim hem swit naes,And kaikai wea olketa kaikaim haed, hem naes tumas.”
18 Bat man hia no savve olketa wea dae finis wea no garem paoa olketa stap lo there,Dat olketa guest blo woman hia stap deep insaed lo Grev.*
Olketa footnote
^ Or, “katemaot.”
^ Heb., “Hem busarem finis animal blo hem for busarem.”
^ Heb., “hem garem heart wea karangge.”
^ Or, “olketa wea no garem experience.”
^ Heb., “hem garem heart wea karangge.”
^ Or, “Sheol.” Diswan hem grev blo olketa man. Lukim “Grev” lo Dictionary.
