Psalm 114:1-8
114 Taem Israel go aot from Egypt,Datfala haos blo Jacob wea go from pipol wea story lo difren languis,
2 Judah kamap holy ples blo hem,Israel, ples wea hem rul ovam.
3 Sea lukim datwan and ranawe,Jordan River tane go bak.
4 Olketa maunten jampjamp, olsem olketa man sheepsheep,Olketa hill, olsem olketa young sheepsheep.
5 Wat nao mekem iu ranawe, O sea?
Why nao iu tane go bak, O Jordan River?
6 Why nao iufala jampjamp olsem olketa man sheepsheep, O olketa maunten,Olsem olketa young sheepsheep, O olketa hill?
7 O earth, iu seksek, bikos lo Lord,Bikos lo God blo Jacob,
8 Wea mekem datfala rock for kamap pool wata blo olketa reed plant,Datfala strong rock for kamap olketa springwata.
